काठमाडौं (हाम्रो खेलकुद) – लगातार दुई सिजनको च्याम्पियन मछिन्द्र फुटबल क्लब यस सिजनको सहिद स्मारक ‘ए’ डिभिजन लिगको पहिलो खेलमै पराजित भएको छ ।

यो सिजनको लिगको पहिलो खेलमा जावलाखेल युथ क्लबसँग ३–१ ले स्तब्ध बनेसँगै मछिन्द्रको सहिद स्मारक ‘ए’ डिभिजन लिगमा अपराजित यात्रामा पूर्ण विराम लागेको छ ।

वि.स. २०७६ मा हिमालयन शेर्पासँग २–० ले पराजित भएयता मछिन्द्र लिगको १९ खेलसम्म अपराजित रहेको थियो । जसमा १७ जित र २ बराबरीको नतिजा छ ।

गत वर्ष मछिन्द्रले १३ खेलमा ११ जित र २ बराबरीसहित अपराजित रहेर केवल दुई गोल खाँदै लिग च्याम्पियन बन्न सफल भएको थियो । तर, यसपटक मछिन्द्रले हार बाट लिगको सुरुवात गरेको छ ।

त्रिपुरेश्वरस्थित दशरथ रंगशालामा मछिन्द्रलाई स्तब्ध पार्न जावलाखेलका हिसब थपलिया, एनकोटो मोसाबी र कप्तान सिमन्त थापाले गोल गरे । मछिन्द्रका देवेन्द्र तामाङको गोल सान्त्वना बन्यो ।

मछिन्द्रले सुरुवाती अग्रता लिएपनि त्यसलाई जोगाउन नसक्दा लिगको पहिलो खेलमा नै पराजित हुन पुगेको हो । खेलको २३औं मिनेटमा देवेन्द्रले फ्रिकिकमार्फत गोल गर्दै मछिन्द्रलाई १–० को अग्रता दिलाएका थिए ।

५९औं मिनेटमा हिसबले गोल गर्दे खेललाई १–१ गोलको बराबरीमा ल्याए । ६४औं मिनेटमा एनकोटोले गोल गर्दै जावलाखेललाई २–१ को अग्रता दिलाए ।

७६औं मिनेटमा कप्तान सिमन्तले गोल गर्दै जावलाखेललाई ३–१ को जित पूनरागमन जित दिलाए । जितसँगै जावलाखेलले ३ अंक जोडेको छ ।