एजेन्सी – पोर्चुगिज फरवार्ड गोन्कालो रामोसले दुई गोलसँगै एक असिस्ट प्रदान गरेपछि पोचुगिज क्लब बेन्फिका सानदार जित दर्ता गर्दै युइएफए च्याम्पियन्स लिगको क्वाटरफाइनलमा प्रवेश गरेको छ ।

प्रि–क्वाटरफाइनलको दोस्रो लेगमा बेल्जियन क्लब ब्रुगमाथि ५–१ को तथा सम्रगमा ७–१ को सानदार जित निकाल्दै बेन्फिका अन्तिम आठमा पुग्न सफल भएको हो । बेन्फिकाले पहिलो लेगमा २–० को जित निकालेको थियो ।

घरेलु मैदानमा बेन्फिकाको जितमा गोन्कालो रामोसले दुई तथा राफा सिल्भा, जोआओ मारियो र डेभिड नेरेसले गोल गरे । क्लब ब्रुगका विजोर्न मेइजेरले एक गोल फर्काए ।

लिस्वोआमा मंगलबार राति भएको खेलको दोस्रो मिनेटमा नै जोआओ मारियोले गोल गरेपनि भिएआरबाट मान्यता नपाउँदा बेन्फिका अग्रता लिनबाट चुक्यो । ३८औं मिनेटमा राफा सिल्भाले गोल गर्दै बेन्फिकालाई १–० को अग्रता दिलाए । उनले गोन्कालो रामोसको पासमा गोल गर्न सफल भए ।

पहिलो हाफको इन्ज्युरी समयको थप गरिएको दोस्रो मिनेटमा रामोसले गोल गर्दै बेन्फिकाको अग्रता दोब्बर पारे । उनले जोआओ मारियोको पासमा गोल गर्न सफल भएका थिए ।

५७औं मिनेटमा रामोसले व्यक्तिगत दोस्रो तथा टोलीका लागि तेस्रो गोल गरेपछि बेन्फिका सहज जिततर्फ अग्रसर बन्यो । उनले एलेक्स ग्रिमाल्डोको पासमा गोल गर्न सफल भएका थिए । ७१औं मिनेटमा जोआओ मारियाले पेनाल्टीमा गोल गर्दै बेन्फिकालाई ४–० ले अघि बढाए ।

७७औं मिनेटमा डेभिड नेरेशले जोआओ नेभेसको पासमा गोल गरेपछि बेन्फिका खेलमा ५–० ले अघि बढ्यो । ८७औं मिनेटमा विजोर्न मेइजेरले टाजोन बुचानानको पासमा गोल गर्दै खेललाई ५–१ को स्थितिमा ल्याएपनि क्लब ब्रुग पराजित हुँदै बाहिरिन पुग्यो ।