काठमाडौं (हाम्रो खेलकुद) – शहिद स्मारक ए डिभिजन लिग अन्तर्गत दोस्रो चरणको खेलमा हिमालयन शेर्पा क्लब र नेपाल पुलिस क्लब खेलिरहेका छन् । खेलको पहिलो हाफमा दुवै टोली गोलरहित बराबरीमा छन् ।

शेर्पाले तुलनात्मक रुपमा बढी अवसर सिर्जना गरेको छ । त्यसो त पहिलो हाफमा पेनाल्टीको अवसर पाएपनि शेर्पा अग्रता लिन सफल भएन । ३१ औं मिनेटमा अजित भण्डारीले डेब्यु गरिरहेका विदेशी फरवार्ड अबयोमी ओलुवासेन फाकुन्लेमाथि फल गरेका थिए । रेफ्री प्रज्वल क्षेत्रीले पेनाल्टीको निर्णय दिएपछि पुलिसका खेलाडी र बेन्च आक्रोशित बनेका थिए ।

तर पेनाल्टी दिने निर्णय पुलिसका लागि घातक सावित भएन । निशान लिम्बुको पेनाल्टी शत्रुघन चौधरीले बचाउँदै खेल गोलरहित नै राखे । निशानले पोस्टको दायाँतर्फ गरेको फितलो प्रहार शत्रुघनले विफल पारे । जवाफी रिबाउन्डमा अमृत श्रेष्ठको प्रहारले पोस्टको दिशा लिन सकेन ।

४१ औं मिनेटमा पुलिसले पनि अग्रता लिने अवसर गुमायो । पेनाल्टी क्षेत्रभित्र लगातार दुई प्रहार डिफेन्डरले छेकेपछि रवी पासवानको अन्तिम प्रहार पोस्टभन्दा थोरैले बाहिरियो ।

४३ औं मिनेटमा पुलिसका गोलरक्षक शत्रुघनले जोगाएको बल टिप्ने क्रममा पेनाल्टी क्षेत्र बाहिर निस्केपछि फ्रिकिक दिए । सत्यम शर्माले प्रहार गरेको फ्रिकिक थोरैले बाहिरियो ।