काठमाडौं (हाम्रो खेलकुद) – मनाङ मर्स्याङ्दी क्लबले सहिद स्मारक ए डिभिजन लिग २०७९ मा पहिलो जित दर्ता गरेको छ । उज्बेकी साइदजामोल दाभ्लातजोनोभको गोलमा मनाङले संकटा क्लबलाई १-० ले हराएको हो ।

मनाङले लिगमा पहिलो जित दर्ता गर्दा संकटा भने पहिलो हार बेहोर्न पुग्यो । दुवै टोली पहिलो खेलमा बराबरीमा रोकिएका थिए । मनाङले २ खेलमा ४ अंक जोड्दा संकटाले २ खेलमा १ अंक जोडेको छ ।

खेलको १९ औं मिनेटमा संकटाले दोहोरो अवसरको फाइदा उठाउन सकेन । फरवार्ड मनिष डाँगीको प्रहार गोलरक्षक दिप कार्कीले राम्रोसँग क्लियर गर्न सकेनन् । जवाफी रिबाउण्डमा आएको बललाई सुनिल श्रेष्ठले खाली पोस्टको दिशा दिएपनि मनाङका प्रवेश कुँवरले गोललाईनबाट क्लियर गरे ।

५३ औं मिनेटमा सुमित श्रेष्ठको प्रहार संकटाका गोलरक्षकले पन्च गर्दै बचाए । लगत्तै मनाङका दाभ्लातले गोल गर्दै मनाङलाई सुरुवाती अग्रता दिलाए । उनले बायाँ विंगबाट गरेको प्रहार संकटाका गोलरक्षक टिकेन्द्र सिंह थापाले पन्च गर्दै बचाएपनि पोस्टभित्र पसेको थियो । उज्बेकी विंगरको प्रहार डिफ्लेक्ट हुँदा गोलरक्षक टिकेन्द्रले ढिला गरि थाहा पाए ।

खेलको ६९ औं मिनेटमा मनाङका सुमित श्रेष्ठको प्रहार पोष्टमाथिबाट आकाशियो । त्यसपछि ८० औं मिनेटमा पनि सुमितले अवसर सदुपयोग गर्न सकेनन् । गोलरक्षक अन्त्यमा बिट भएपनि उनको हाफ भली पोस्टभन्दा निकै माथि गएको थियो । इन्ज्युरी समयमा संकटाका चन्दन कुमार दासको प्रहारले पोस्टको दिशा लिन नसक्दा टोली हार बेहोर्न बाध्यो भयो ।

त्यसअघि दिनको पहिलो खेलमा डिफेन्डर अमृत श्रेष्ठले इन्ज्युरी समयमा गरेको गोलमा हिमालयन शेर्पा क्लबले शहिद स्मारक ए डिभिजन लिगमा पहिलो जित गरेको थियो । शेर्पाले नेपाल पुलिस क्लबमाथि १-० को जित दर्ता गरेको हो ।

दशरथ रंगशालामा भएको खेलमा शेर्पाले पहिलो हाफमा शेर्पाले तुलनात्मक रुपमा बढी अवसर सिर्जना गरेपनि अग्रता लिएको थिएन । दोस्रो हाफमा दुवै टोलीले अपेक्षित खेल प्रदर्शन गर्न सकेनन् । तर इन्ज्युरी समयमा शेर्पाले गोल गर्यो । कर्नरमा क्लियर हुन नसकेको बलमा अमृतले गोल गरेका थिए ।

त्यसो त पहिलो हाफमा पेनाल्टीको अवसर पाएपनि शेर्पा अग्रता लिन सफल भएन । ३१ औं मिनेटमा अजित भण्डारीले डेब्यु गरिरहेका विदेशी फरवार्ड अबयोमी ओलुवासेन फाकुन्लेमाथि फल गरेका थिए । रेफ्री प्रज्वल क्षेत्रीले पेनाल्टीको निर्णय दिएपछि पुलिसका खेलाडी र बेन्च आक्रोशित बनेका थिए ।

तर पेनाल्टी दिने निर्णय पुलिसका लागि घातक सावित भएन । निशान लिम्बुको पेनाल्टी शत्रुघन चौधरीले बचाउँदै खेल गोलरहित नै राखे । निशानले पोस्टको दायाँतर्फ गरेको फितलो प्रहार शत्रुघनले विफल पारे । जवाफी रिबाउन्डमा अमृत श्रेष्ठको प्रहारले पोस्टको दिशा लिन सकेन ।

४१ औं मिनेटमा पुलिसले पनि अग्रता लिने अवसर गुमायो । पेनाल्टी क्षेत्रभित्र लगातार दुई प्रहार डिफेन्डरले छेकेपछि रवी पासवानको अन्तिम प्रहार पोस्टभन्दा थोरैले बाहिरियो ।

४३ औं मिनेटमा पुलिसका गोलरक्षक शत्रुघनले जोगाएको बल टिप्ने क्रममा पेनाल्टी क्षेत्र बाहिर निस्केपछि फ्रिकिक दिए । सत्यम शर्माले प्रहार गरेको फ्रिकिक थोरैले बाहिरियो ।

दोस्रो हाफमा दुवै टोलीले डरलाग्दो आक्रमण सिर्जना गर्न सकेनन् । शेर्पाले ७२ औं मिनेटमा गोलरक्षक तथा कप्तान किशोर गिरीलाई चोटका कारण गुमाएको थियो । अन्त्यत्यिर तीन विदेशी फरवार्ड उतार्दै शेर्पाले लगातार दबाब दिएको थियो । फलस्वरूप कर्नरबाट शेर्पाले अमृतमार्फत जित दर्ता गर्यो ।

पुलिस यस नतिजासँगै २ खेलमा कुनै अंक जोड्न सकेको छैन । टोलीले यसअघि पहिलो खेलमा चर्च ब्वाइजसँग २-१ ले पराजित भएको थियो । शेर्पाले भने २ खेलमा ४ अंक जोडेको छ । पहिलो खेलमा शेर्पा र मनाङ १-१ को बराबरी रोकिएका थिए ।