काठमाडौं (हाम्रो खेलकुद) – साविकको विजेता मछिन्द्र फुटबल क्लबलाई पराजित गर्दै त्रिभुवन आर्मी फुटबल क्लबले यो सिजनको सहिद स्मारक ‘ए’ डिभिजन लिगमा पहिलो जित दर्ता गरेको छ ।

आर्मीले मछिन्द्रलाई २–० ले पराजित गर्दै लिगमा पहिलो जित दर्ता गरेको हो । पहिलो खेलमा आर्मी संकटासँग गोलरहित बराबरीमा रोकिएको थियो ।

ललितपुरको च्यासलस्थित च्यासल रंगशालामा बिहीबार भएको खेलमा आर्मीको जितमा दीपक गुरुङ र कप्तान नवयुग श्रेष्ठले गोल गरे । दुवै गोल दोस्रो हाफमा भएको थियो ।

खेलको ४८औं मिनेटमा दीपक गुरुङले गोल गर्दै आर्मीलाई १–० को अग्रता दिलाए । ५९औं मिनेटमा कप्तान नवयुग श्रेष्ठले पेनाल्टीमा गोल गर्दै आर्मीको अग्रता दोब्बर पारे ।

यस जितसँगै आर्मीको दुई खेलबाट ४ अंक पुगेको छ । लगातार दोस्रो हार बेहोरेको साविकको विजेता मछिन्द्रले अंकको खाता खोल्न सकेको छैन ।

जावलाखेलसँग ३–१ ले पराजित भएपछि लिगमा मछिन्द्रको अपराजित यात्रा २०औं खेलमा टुंगिएको थियो । वि.स. २०७६ को लिगमा हिमालयन शेर्पासँग सातौं राउन्डमा २–० ले पराजित भएयता मछिन्द्र लिगको १९ खेलसम्म अपराजित रहेको थियो । जसमा १७ जित र २ बराबरीको नतिजा थियो ।

शेर्पासँगको हारपछि मछिन्द्रले त्यसपछि सबै ६ खेलमा जित निकाल्दै लिग च्याम्पियन बनेको थियो । गत वर्ष मछिन्द्रले १३ खेलमा ११ जित र २ बराबरीसहित अपराजित रहेर केवल दुई गोल खाँदै लिग च्याम्पियन बन्न सफल भएको थियो । तर, यसपटक मछिन्द्रले लगातार सुरुवाती दुई हार बेहोरिसकेको छ ।