काठमाडौं (हाम्रो खेलकुद) – नवप्रवेशी चर्च ब्वाइज युनाइटेड फुटबल क्लबले सहिद स्मारक ए डिभिजन लिगमा लगातार तेस्रो जित दर्ता गरेको छ ।

दशरथ रंगशालामा शुक्रबार भएको खेलमा हिमालयन शेर्पालाई १-० ले पराजित गर्दै चर्च ब्वाइजले शीर्ष स्थानमा ४ अंकको अग्रता कायम गरेको हो । चर्च ब्वाइजको जितमा आशिष चौधरीले पहिलो हाफमा गरेको गोल नै निर्णायक सावित भयो ।

खेलको २० औं मिनेटमा आशिषले गोल गर्दै चर्च ब्वाइजलाई सुरुवाती अग्रता दिलाएका थिए । मैदानको मध्यभागबाट एरिक विष्टले दिएको लामो पासलाई आशिषले उत्कृष्ट नियन्त्रणका साथ पेनाल्टी क्षेत्रभित्र पस्दै फिनिस गरेका थिए । त्यसअघि खेलको पाँचौं मिनेटमा चर्च ब्वाइजका एरिक विष्टको प्रहार शेर्पाका अमृत श्रेष्ठले विफल पारेका थिए ।

२३ औं मिनेटमा चर्च ब्वाइजका मिलन राईको प्रहार शेर्पाका गोलरक्षक विवश चौधरीले रोक्दा अग्रता दोब्बर गर्ने अवसर गुमायो । खेलको ३७ औं शेर्पाका सत्यम शर्माको फ्रिकीक गोलरक्षक एभ्स प्रिसोले बचाएपछि पोष्टमा लाग्दै बाहिरिएको थियो । ४४ औं मिनेटमा चर्च ब्वाइजका आकाश चापागाइको प्रहार बारको माथिबाट बाहिरिंदा अग्रता दोब्बर पार्ने अवसर गुमाउन पुग्यो ।

६२ औं मिनेटमा शेर्पाका अमृत श्रेष्ठको हेडर गोलरक्षक प्रिसोले रोके। खेलको ६५ औं मिनेटमा चर्चब्वाइजका अशिष चौधरी वन भर्सेस वनमा गोल गर्ने चुक्दा चर्च ब्वाइज अग्रता दोब्बर बनाउन चुक्यो । खेलको ७६ औं मिनेटमा शर्पाका सत्यमको प्रहार गोलरक्षकले रोक्दै बराबरीको गर्ने अवसर दिएनन् ।

यस जितसँगै चर्च ब्वाइजले ३ खेलमा ९ अंक जोडेको छ । शेर्पा भने ३ खेलमा ४ अंक जोड्दै मध्य तालिकामा छ ।