काठमाडौं (हाम्रो खेलकुद) – विभागीय नेपाल पुलिस क्लबले यस सिजनको सहिद स्मारक ‘ए’ डिभिजन लिगमा लगातार तेस्रो हार बेहोरेको छ ।

संकटा क्लबसँग ३–० ले पराजित भएसँगै पुलिसले यो सिजनको सुरुवाती तीन खेल नै गुमाउन पुगेको हो । पुलिस पहिलो खेलमा चर्च ब्वाइज युनाइटेडसँग २–१ ले तथा दोस्रो खेलमा हिमालयन शेर्पासँग १–० ले पराजित भएको थियो । त्यो हारको श्रृंखलालाई पुलिसले संकटाविरुद्ध पनि दियो ।

ललितपुरको च्यासलस्थित च्यासल रंगशालामा शनिबार भएको खेलमा संकटाको जितमा गणेश हमाल, रोशन पहरी र सुरज ज्यू ठकुरीले गोल गरे । पहिलो हाफमा एक तथा दोस्रो हाफमा दुई गोल भएको थियो ।

१२औं मिनेटमा गणेश हमालले गोल गर्दै संकटालाई १–० को अग्रता दिलाए । जुनियर एनकेन्गेको पासमा गणेश हमालले एक डिफेन्डर र गोलरक्षक शत्रुघन चौधरीलाई बिट गर्दै गोल गर्न सफल भएका थिए ।

८०औं मिनेटमा परिवर्तित खेलाडी रोशन पहरीले गोल गर्दै संकटाको अग्रता दोब्बर पारे । ५७औं मिनेटमा सुनिल श्रेष्ठको स्थानमा मैदान छिरेका रोशनल निशान खड्काको क्रसमा हेमन्त श्रेष्ठले राम्रोसँग क्लियर गर्न नसकेको बललाई पेनाल्टी बक्सबाहिरबाट गरेको सशक्त प्रहार गोलमा परिणत हुँदा पुलिसका गोलरक्षक शत्रुघन चौधरीले रोक्ने कुनै मौका नै पाएन ।

८६औं मिनेटमा सुरज ज्यू ठकुरीले गोल गर्दै संकटालाई ३–० को जित दिलाए । मनिष डाँगीले मिलाइदिएको पासमा सुरज ज्यू ठकुरीले पेनाल्टी बक्सबाहिरबाट गरेको प्रहारले जाली चुमेको थियो । सुरजको प्रहारमा पुलिसका गोलरक्षक शत्रुघनले ठम्याएपनि बचाउन सकेनन् ।

संकटाको यो पहिलो जित हो । यसअघि संकटाले पहिलो खेलमा आर्मीसँग गोलरहित बराबरी खेल्दा दोस्रो खेलमा मनाङसँग १–० ले पराजित भएको थियो । पहिलो जितसँगै संकटाको ३ खेलबाट ४ अंक पुगेको छ । तीनै खेल गुमाएको पुलिसले अंकको खाता खोल्न सकेको छैन ।

पुलिसले गत वर्ष च्यासल युथ क्लबलाई २–१ ले पराजित गरेयता लिगमा जित निकाल्न सकेको छैन । त्यसपछि पुलिसले सकंटासहित ७ खेल खेल्दा जित निकाल्न सकेको छ । च्यासललाई हराएपछि पुलिसले सातदोबाटोसँग १–० को हार, थ्री स्टार र एपिएफसँग समान १–१ गोलको बराबरी तथा एनआरटीसँग ३–१ ले पराजित भएको थियो ।