काठमाडौं (हाम्रो खेलकुद) – इन्ज्युरी समयमा दीपक राज सिंह ठकुरीले गोल गरेपछि सातदोबाटो युथ क्लबले यो सिजनको सहिद स्मारक ‘ए’ डिभिजन लिगमा लगातार तेस्रो जित निकालेको छ ।

फ्रेन्ड्स क्लबलाई १–० ले पराजित गर्दै सातदोबाटोले लिगमा लगातार तेस्रो जित दर्ता गरेको हो । सातदोबाटोको जितमा इन्ज्युरी समयको थप गरिएको तेस्रो मिनेटमा दीपक राज सिंह ठकुरीले गरेको गोल नै निर्णायक बन्यो ।

निरज चौधरीले पेनाल्टी बक्समा उपलध्ब गराएको पासमा दीपकले प्रेम भण्डारी र गोलरक्षक राजा बाबु थापालाई बिट गर्दै गोल गर्न सफल भएका थिए । जारी लिगमा उनको यो तेस्रो गोल हो ।

त्यसअघि त्रिपुरेश्वरस्थित दशरथ रंगशालामा शनिबार भएको खेलको ४३औं मिनेटमा रफिक अमिनुको प्रहारलाई नरेन्द्र चौधरीले गोललाइन नजिकैबाट क्लियर गर्दा फ्रेन्ड्स अग्रता लिनबाट चुक्यो ।

त्यसमै कप्तान प्रकाश बुढाथोकीको कर्नरमा हेडरमार्फत आएको बललाई रफिक एमिनुको हेडरलाई सुशिल लामाले गोललाइनबाट बचाउँदै सातदोबाटोलाई खेलमा राखे । त्यसकै रिवाउन्डमा प्रकाश बुढाथोकीको प्रहारलाई अब्दुल अबुबकारीले ब्लक गरिदिए ।

लगातार तेस्रो जितसँगै सातदोबाटोले शीर्षस्थानको चर्च ब्वाइज युनाइटेडसँगको अंक दुरी बराबरी गरेको छ । दुवै टोलीको समान ३ खेलबाट ९ अंक पुगेको छ । सातदोबाटोले पहिलो खेलमा एनआरटीलाई २–१ ले तथा दोस्रो खेलमा एपिएफलाई १–० ले पराजित गरेको थियो ।

फ्रेन्ड्सको यो दोस्रो हार हो । पहिलो खेलमा एफसी खुमलटारसँग १–० ले पराजित भएको फ्रेन्ड्सले आफ्नो दोस्रो खेलमा थ्री स्टारसँग ३–३ गोलको बराबरी खेलेको थियो । यस हारसँगै फ्रेन्ड्सले तीन खेलबाट १ अंक जोडेको छ ।