एजेन्सी – स्पेनिस ला लिगामा रियल म्याड्रिडले सानदार पूनरागमन जित निकालेको छ । घरेलु मैदानमा एक गोलले पछि परेको स्थिति उल्ट्याएर रियलले स्पान्योलमाथि ३–१ को पूनरागमन जित निकालेको हो ।

सान्टियागो बर्नबेउमा शनिबार राति भएको खेलमा रियलको पूनरागमन जितमा भिनिसियस जुनियर, एडर मिलिसाओ र मार्काे एसेन्सियोले गोल गरे । स्पान्योलका जोसेलुको गोल सान्त्वना बन्यो ।

खेलको आठौं मिनेटमा जोसेलुको गोलबाट रियल खेलमा पछि परेको थियो । उनले रुवेन सान्चेजको पासमा गोल गर्न सफल भएका थिए । एक गोलले पछि परेको रियल २२औं मिनेटमै खेलमा फर्कियो । भिनिसियस जुनियरले टोनी क्रुसको पासमा गोल गर्दै खेललाई १–१ गोलको बराबरीमा ल्याए ।

३९औं मिनेटमा एडर मिलिसाओले गोल गरेपछि रियलले पहिलो हाफमा २–१ को अग्रता लिन सफल भयो । उनले औरेलिएन चुआमेनीको पासलाई सदुपयोग गरेका थिए ।

त्यसपछि इन्ज्युरी समयको थप गरिएको तेस्रो मिनेटमा परिवर्तित खेलाडी मार्काे एसेन्सियोले गोल गर्दै रियललाई ३–१ को पूनरागमन जित दिलाए । ७२औं मिनेटमा लुका मोड्रिचको स्थानमा मैदान छिरेका एसेन्सियोले नाचो फर्नान्डेसको पासमा गोल गर्न सफल भएका थिए ।

यस जितसँगै रियलले शीर्षस्थानको बार्सिलोनासँगको अंक दुरी ६ मा छोट्याएको छ । रियलको २५ खेलबाट ५६ अंक पुगेको छ । एक खेल कम खेलेको बार्सिलोनाको ६२ अंक छ । पराजित स्पान्योल २५ खेलबाटै २७ अंक जोडेर १३औं स्थानमा छ ।