काठमाडौं (हाम्रो खेलकुद) – एएफसी यू–२० महिला एसियन कप छनोटमा नेपालले आज आफ्नो अन्तिम खेलमा नर्दन मारियाना आइल्याण्डसँग खेल्दैछ ।

यो खेल प्यालेस्टाइनको फैजल हल हुसेइनी इन्टरनेशनल स्टेडियममा नेपाली समयअनुसार राति ६ः४५ बजेपछि हुनेछ । नर्दन मारियाना आइल्याण्डलाई बराबरीमा रोकेपनि नेपाल दोस्रो चरणमा छनोट हुनेछ ।

नेपालले पहिलो खेलमा घरेलु टोली प्यालेस्टाइनलाई ६–० ले पराजित गरेको थियो । जसमा दीपा शाहीले ४ तथा गरिमा राईले दुई गोल गरेकी थिइन् ।

नेपाल सोही जितको लयलाई निरन्तरता दिदै लगातार दोस्रो जितसहित समूह विजेता बनेर दोस्रो चरणमा प्रवेश गर्ने लक्ष्यमा मैदानमा उत्रनेछ ।

यता, आयोजक तथा घरेलु टोली प्यालेस्टाइनसँग ३–१ ले पराजित भएको नर्दन मारियाना आइल्याण्ड पनि नेपाललाई स्तब्ध पार्ने लक्ष्यमा मैदान उत्रनेछ ।

यो समूह ‘बी’ मा नेपाल र प्यालेस्टाइनको समान ३ अंक रहेपनि गोल अन्तरमा नेपाल अघि छ । नर्दन मारियाना आइल्याण्डले अंकको खाता खोल्न सकेको छैन ।

पहिलो चरणबाट ८ समूहको विजेता टोली दोस्रो चरणमा प्रवेश गर्नेछन् । दोस्रो चरणमा ८ टोलीलाई दुई समूहमा विभाजन गरिनेछ । जसबाट उत्कृष्ट ४ टोलीले उज्वेकिस्तानमा हुने यू–२० महिला एसियन कप खेल्नेछ ।

एएफसी यू–२० महिला एसियन कपमा सन् २०२४ को मार्च ३ देखि १६ सम्म उज्वेकिस्तानमा हुँदैछ ।
आयोजक उज्वेकिस्तानसहित २०१९ को विजेता जापान, दोस्रो भएको उत्तर कोरिया र तेस्रो भएको दक्षिण कोरिया गरी चार टिम छनोट भइसकेका छन् ।