एजेन्सी – इंग्लिस प्रिमियर लिगको शीर्षस्थानमा रहेको लन्डन क्लब आर्सनलले सानदार जित दर्ता गर्दै आफ्नो शीर्षतालाई कायमै राखेको छ ।

घरेलु टोली फुलहमलाई ३–० ले पराजित गर्दै आर्सनलले शीर्षस्थानमा पुनः ५ अंकको अग्रता कायम गर्न सफल भएको हो तीन गोलमा नै लियान्द्रो ट्रोसार्डले असिस्ट प्रदान गरे । सबै तीन गोल पहिलो हाफमा नै भएको थियो ।

क्राभेन कटेज फुलहममा आइतबार राति भएको खेलमा आर्सनलको जितमा गाब्रिएल, गाब्रिएल मार्टिनेली र कप्तान मार्टिन ओडेगार्डले गोल गरे ।

खेलको १६औं मिनेटमा एन्टोनी रोविन्सनले गोल गरेपनि भिएआरबाट मान्यता नपाउँदा आर्सनल अग्रता लिनबाट चुकेको थियो । तर, २१औं मिनेटमा गाब्रिएलले गोल गर्दै आर्सनललाई १–० को अग्रता दिलाए । उनले लियान्द्रो ट्रोसार्डको पासमा गोल गर्न सफल भएका थिए ।

२६औं मिनेटमा गाब्रिएल मार्टिनेलीले गोल गर्दै आर्सनलको अग्रता दोब्बर पारे । मार्टिनेलीले पनि ट्रोसार्डकै पासमा गोल गर्न सफल भएका थिए ।

पहिलो हाफको थप गरिएको इन्ज्युरी समयमा कप्तान मार्टिन ओडेगार्डले लियान्द्रो ट्रोसार्डकै पासमा गोल गरेपछि आर्सनल पहिलो हाफमा ३–० ले अघि बढ्यो । दोस्रो हाफमा दुवै टोलीले केही अवसर सिर्जना गरेपनि सदुपयोग गर्न नसक्दा पहिलो हाफको गोल नै आर्सनलको जितमा पर्याप्त बन्यो ।

यस जितसँगै शीर्षस्थानको आर्सनलको २६ खेलबाट ६६ अंक पुगेको छ । आर्सनलले दोस्रो स्थानको म्यानचेस्टर सिटीलाई ५ अंकले पछि पारेको छ । सिटीको ६१ अंक छ । पराजित फुलहम ३९ अंक जोडेर आठौं स्थानमा छ ।