काठमाडौं (हाम्रो खेलकुद) – फिफा क्यालेन्डरमा अखिल नेपाल फुटबल संघ (एन्फा) ले नेपालसहित लाओस र भुटानसम्मिलित प्रधानमन्त्री थ्री नेसन्स कप फुटबल आयोजना गर्ने भएको छ ।

एन्फाले सोमबार पत्रकार सम्मेलन गर्दै थ्री नेसन्स कप चैत ८ देखि १७ गतेसम हुने जनाएको छ । त्रिपुरेश्वरस्थित दशरथ रंगशालामा आयोजना हुने थ्री नेसन्स कपमा नेपालसहित भुटान र लाओसको सहभागिता रहने एन्फाले जनाएको छ ।

सिंगल राउण्ड रोविनको आधारमा हुने थ्री नेसन्स कपमा नेपालले चैत ८ गते लाओससँग खेल्नेछ । चैत ११ गते भुटान र लाओसले खेल्नेछ । चैत १४ गते नेपाल र भुटानबीच प्रतिस्पर्धा हुनेछ ।

त्यसपछि शीर्ष दुई टोलीले उपाधिका लागि चैत १७ गते प्रतिस्पर्धा गर्नेछ । फिफाले दुई खेललाई मात्रै आफ्नो क्यालेन्डरमा समावेश गरेकाले फाइनल खेल फिफाको क्यालेन्डरमा नहुने एन्फाले जनाएको छ । नेपालले नव नियुक्त प्रशिक्षक भिन्सेन्जो अल्बर्टो एनेसको प्रशिक्षणमा खेल्नेछ ।

थ्री नेसन्स कपको लागि एन्फाले करिव १ करोड ७७ लाख रुपैयाँ खर्च हुने अनुमान गरेको छ । एन्फाका प्रवक्ता सुरेश शाहले थ्री नेसन्स कपका लागि फिलिपिन्स र मलेसियालाई प्रस्ताव राखेपनि उनीहरु अर्काे खेलमा व्यस्त रहनुपरेपछि लाओस र भुटानले खेल्ने पक्का भएको जनाएको छ ।

प्रतियोगितामा एन्फाले दुई फरक टिकट दर राखेको छ । सामान्य प्यारापिटतर्फ ५ सय र भीभीआईपीतर्फ १ हजार टिकट दर राखिएको एन्फाले जनाएको छ । यसअघि नेपालले २०७७ को चैतमा नेपालले बंगलादेश र किर्गिस्तानको ओलम्पिक टोलीलाई समेटेर थ्री नेसन्स कपको आयोजना गर्दा नेपालले बंगलादेशलाई हराएर च्याम्पियन बनेको थियो ।