काठमाडौं (हाम्रो खेलकुद) – एफसी खुमलटारले सहिद स्मारक ‘ए’ डिभिजन लिगमा दोस्रो जित दर्ता गर्ने क्रममा हिमालयन शेर्पा क्लबलाई पराजित गरेको छ ।

खुमलटारले शेर्पालाई २–१ ले पराजित गरेको हो । खुमलटारको जितमा मनिष थापा र स्टेफन विनोङ समिरले गोल गरे । शेर्पाका कप्तान विश्वास श्रेष्ठले एक गोल फर्काए ।

ललितपुरको च्यासलस्थित च्यासल रंगशालामा सोमबार भएको खेलको २२औं मिनेटमा मनिष थापाको गोलबाट खुमलटारले पहिलो हाफमा १–० को अग्रता लिन सफल भएको थियो । पहिलो हाफको इन्ज्युरी समयमा एबियोमी फकुन्लेको प्रहारलाई खुमलटारका गोलरक्षक देव लिम्बुले बचाउँदा शेर्पा बराबरीबाट चुकेको थियो ।

५७औं मिनेटमा मेसुके ओलोमोउको प्रहारलाई शेर्पाका गोलरक्षक विवश चौधरीले विफल पारिदिए । ६५औं मिनेटमा स्टेफन विनोङले गोल गर्दै खुमलटारको अग्रता दोब्बर पारे । ७९औं मिनेटमा कप्तान विश्वस श्रेष्ठले फ्रिकिकमार्फत गोल गर्दै हिमालयनलाई खेलमा फर्काउने प्रयास गरे ।

इन्ज्युरी समयमा सत्यम शर्माको प्रहारमा गोलरक्षक देव बाधक बन्दा शेर्पा बराबरीबाट चुक्यो । तर, त्यसपछि थप गोल निस्कन नसक्दा खुमलटारले लिगमा दोस्रो जित निकाल्न सफल भयो ।

यस जितसँगै खुमलटारले ४ खेलबाट ६ अंक जोडेको छ । पराजित शेर्पाको ४ खेलबाट ४ अंक नै छ । ‘ए’ डिभिजनको डेब्यु खेलमै फ्रेन्ड्स क्लबलाई हराएर सुखद् सुरुवात गरेको खुमलटारले त्यसपछि चर्च ब्वाइज युनाइटेडसँग ३–१ तथा थ्री स्टारसँग २–० ले पराजित भएको थियो ।

यता, पहिलो खेलमा मनाङसँग १–१ गोलको बराबरी खेलेको शेर्पाले पुलिसलाई १–० ले पराजित गर्दा चर्च ब्वाइजसँग १–० ले पराजित भएको थियो ।