काठमाडौं (हाम्रो खेलकुद) – कप्तान प्रकाश बुढाथोकीले एक गोलसँगै एक असिस्ट प्रदान गरेपछि फ्रेन्ड्स क्लबले सहिद स्मारक ‘ए’ डिभिजन लिगमा पहिलो जित दर्ता गरेको छ । जावलाखेल युथ क्लबलाई २–१ ले पराजित गर्दै फ्रेन्ड्सले चौथो राउन्डमा जित दर्ता गरेको हो ।

त्रिपुरेश्वरस्थित दशरथ रंगशालामा मंगलबार भएको खेलमा फ्रेन्ड्सको जितमा रफिक एमिनु र कप्तान प्रकाश बुढाथोकीले गोल गरे । जावलाखेलका फोडे फोफानाले एक गोल फर्काए ।

खेलको १९औं मिनेटमा रफिक एमिनुको गोलबाट फ्रेन्ड्सलाई १–० को अग्रता दिलाए । एख्रोवेक उक्तामोभको लामो पासलाई नियन्त्रणमा लिदै कप्तान प्रकाश बुढाथोकीले वान भर्सेस वानको स्थितिमा गरेको प्रहारलाई जावलाखेलका गोलरक्षक अनिष देउलाले नियन्त्रणमा लिन नसकेको बललाई नजिकै रहेका रफिकले गोल गर्न सफल भए ।

४०औं मिनेटमा कप्तान प्रकाश बुढाथोकीले गोल गरेपछि फ्रेन्ड्सले पहिलो हाफमा २–० को अग्रता दिलाए । लक्ष्मण रुचालको क्रसलाई रफिकले नभेटेको बललाई प्रकाशले दोस्रो बार च्याप्दै गरेको प्रहारलाई जावलाखेलका गोलरक्षक अनिषले बचाउन सकेनन् ।

त्यसपछि ८७औं मिनेटमा फोडे फोफानाले पेनाल्टीमा गोल गर्दै खेललाई २–१ को स्थितिमा ल्याउँदै जावलाखेललाई खेलमा फर्काउने संकेत दिएपनि त्यसपछि थप गोल निस्कन नसक्दा फ्रेन्ड्सले लिगमा पहिलो जित निकाल्न सफल भयो ।

पेनाल्टी बक्समा अमित तामाङले समिराज थोकरलाई फउल गरेपछि रेफ्रीले जावलाखेललाई पेनाल्टी प्रदान गर्दा फोफाना चुकेनन् ।

इन्ज्युरी समयको थप गरिएको पाँचौ मिनेटमा जावलाखेल १० खेलाडीमा समेटिन पुग्यो । रफिक अमिनुलाई हातले धकेलेपछि रेफ्री विश्वास कार्कीले कप्तान सिमन्त थापालाई दोहोरो पहेलो कार्डसहित मैदान बाहिर पठाए । त्यसपछि थप गोल निस्कन नसक्दा फ्रेन्ड्स विजयी हुन सफल भयो ।

यस जितसँगै फ्रेन्ड्सले ४ खेलबाट ४ अंक जोडेको छ । पराजित जावलाखेलको यो पहिलो हार हो । जावलाखेलको ४ खेलबाट ७ अंक छ । यसअघि जावलाखेलले पहिलो खेलमा मछिन्द्रलाई ३–१ र दोस्रो खेलमा एनआरटीलाई २–१ ले पराजित गर्दा तेस्रो खेलमा एपिएफसँग गोलरहित बराबरी खेलेको थियो ।