काठमाडौं (हाम्रो खेलकुद)– मछिन्द्र क्लबका प्रशिक्षक प्रवेश कटुवाल राष्ट्रिय पुरुष फुटबल टोलीको सहायक प्रशिक्षक नियुक्त भएका छन् । त्यस्तै विनोद डंगोलले गोल किपर प्रशिक्षक नियुक्त भएका छन् ।

अखिल नेपाल फुटबल संघ (एन्फा) ले केहि दिन अघि नै नियुक्त पत्र दिएपनि बुधबारमात्र आफ्नो फेसबुकमार्फत सार्वजनिक गरेको छ । कटुवालले मंगलबार मात्र पनि मछिन्द्र क्लबको प्रशिक्षण सम्हालेका थिए ।

दशरथ रंगशालामा भएको खेलमा मछिन्द्रले नेपाल पुलिस क्लबलाई २–१ ले हराएको थियो । यो सिजनमा मछिन्द्रको चौथो खेलमा त्यो पहिलो जित थियो । कटुवालको प्रशिक्षणमा मछिन्द्रले ए डिभिजन लिगको पछिल्लो दुई संस्करण जितेको थियो ।

एन्फाले कटुवाललाई कात्तिकमा पाकिस्तानविरुद्धको एक मैत्रीपूर्ण खेलका लागि मुख्य कार्यवहाक प्रशिक्षक नियुक्त गरेको थियो । त्यो मैत्रीपूर्ण खेल नेपालले १–० ले जितेको थियो ।

नेपाली टोलीले चैत ८ देखि १७ गते सम्म दशरथ रंगशालामा हुने थ्री नेसन्स कप खेल्दैछ । त्यसमा प्रतिस्पर्धा गर्नका लागि लाओस र भुटान नेपाल आउँदैछन् । केहि दिन अघि मात्र एन्फाले इटालियन प्रशिक्षक भिन्सेन्जो अल्बर्टो अनेसेलाई एक वर्षका लागि राष्ट्रिय फुटबल टोलीको प्रशिक्षक नियुक्त गरेको थियो ।