दिपेश तिमल्सिना
सिलगुढी (भारत)– झन्डै डेढ बर्षमा नेपाली फुटबलले एक पछि अर्को सफलताको सिढी चढ्दै आएको छ । त्यसमा मुख्यतः पुरुष टोलीले सफलता दिलाएको छ । यद्दपी, महिला टोलीको प्रदर्शन पनि कमजोर भएन थिएन । मात्रै महिला टोली च्याम्पियन बनेर फर्कन सकेको छैन, जसरी चारवटा प्रतियोगितामा नेपाली पुरुष टोली विजेता बन्न सफल भएको छ ।

२०७२ भदौमा साफ यू १९ जितेको नेपालको सिनियर टोलीले माघमा बंगबन्धु गोल्डकप र फागुनमा १२ औं दक्षिण एसियाली खेलकुद (साग) को यू २३ मा स्वर्ण पदक जितेको थियो । त्यहि सागको महिला फुटबलको फाइनलमा भने पराजित हुँदै नेपाल रजत पदक लिएर फर्केको थियो ।

पुरुष टोलीको सफलता त्यतिमा रोकिएन डेढ महिना अघि एएफसी सोलिडारिटी कप जितेरअघि सम्मकै ठूलो सफलता हासिल गरिसकेको छ । त्यहि विजतोका हैसियतमा एएफसी एसिया कप २०१९ को छनोट खेल्ने मौका पाउने भएको छ । यी तमाम सफलताका वावजुद पुरुष टोली साफ च्याम्पिनसिपको च्याम्पियन बन्न भने अझै पनि सकेको छैन । अहिले सम्म फाइनल पनि पुग्न सकेको छैन ।

तर, महिला साफ च्याम्पियनसिपमा भने हरेक पटक फाइनल पुग्दै आएको छ । तीन पटक फाइनल खेल्दा पनि टोली च्याम्पियन भने बन्न सकेको छैन । यसपटक महिला टोली सामू च्याम्पियन बनेर फर्कने सम्भावना छ । तर, त्यसका लागि फाइनल अघिको फाइनल जित्नुपर्छ ।

भारतको सिलगुढीमा जारी महिला साफ च्याम्पिनसिपमा आज नेपाल र आयोजक भिड्दैछन् । नेपाली प्रशिक्षक कुमार थापा र भारतीय प्रशिक्षक साजिद दार दुवैले यसलाई फाइनल सरह मानेका छन् । धेरैको अनुमान छ, आजको खेल जित्ने नै साफको च्याम्पियन बन्नेछ । भारत त्यस्तो दक्षिण एसियाको टोली जसलाई कसैले अहिले सम्म हराउन सकेको छैन ।

समूह चरणमा बंगलादेशसँग गोलरहित बराबरीमा रोकिनु भारतको अहिले सम्मको खराब प्रदर्शनमा पर्दछ । नेपाल पनि दक्षिण एसियाको भारतपछिको दोस्रो उत्कृष्ट टोली हो । दक्षिण एसियामा भारतबाहेक सबै टोलीलाई नेपालले हराउँदै आएको छ । यसपटक नेपालले आफुलाई भारतभन्दा अब्बल सावित गर्ने मौका सेमिफाइनलमै प्राप्त गरेको छ । आजको खेलमा भारतलाई हराउन सके नेपाली महिला फुटबलको स्तर अझै माथि उठेको प्रमाणित हुनेछ ।

सेमिफाइनलमा भारतलाई हराउन भनेको ५० प्रतिसत च्याम्पियन भए बराबर हो । साफ च्याम्पियनसिपमा नयाँ च्याम्पियन बनेर फर्कन सकिन्छ भन्ने पुरुष टोलीलाई पनि सन्देश दिनका लागि भारतसँगको नतिजा महत्वपूर्ण हुनेछ । यसपटक महिला टोली च्याम्पियन बनेर फर्केमा अर्को बर्ष हुने पुरुष च्याम्पियनसिपको तयारीका लागि नेपाली पुरुष टोलीको मनोबल पनि उच्च रहनेछ ।

भारतलाई हराउने र साफ च्याम्पियनसिपको च्याम्पियन बन्ने यस्तै सम्भावना सधै नेपाली टोलीले नपाउन सक्छ । यस्तो मौका बारम्बार प्राप्त नहुनपनि सक्छ । फागुनमा सागमा भोगेको ४–० को हारको बदला लिने र च्याम्पियन बन्ने बाटोमा अझै एककदम अघि बढ्ने आजको खेल महत्वपूर्ण छ । नेपाली समय अनुसार दिउँसो २ः१५ मा सुरु हुने सेमिफाइनलमा नेपाली महिला टोलीलाई सफलताको शुभकामना ।