हेटौंडा (हाम्रो खेलकुद) – सिएमजी क्लब संकटा क्लब काठमाडौंले टुबोर्ग हेटौंडा गोल्डकप फुटबल प्रतियोगिताको क्वार्टरफाइनलमा पुगेको छ । सुमन भोम्जन स्मृति खेलकुद प्रतिष्ठानको आयोजनामा हेटौंडा–१० स्थित फरेष्ट्री खेल मैदानमा जारी प्रतियोगितामा भुटानको डुकस्टार फुटबल क्लबको चुनौती १–० गोलअन्तरले पन्छाउँदै संकटाले प्रतियोगितामा विजयी सुरुवात गरेको हो । संकटाले सेमिफाइनल प्रवेशका लागि बुधबार नेपाल आर्मीको सामना गर्नेछ ।

खेलको ८४ औं मिनेटमा संकटाका लागि अनिल गुरुङले गोल गरेका थिए । उनले डिबक्स नजिकैबाट प्रहार गरेको बल गोलमा परिणत भएको थियो । उनको यो गोलसँगै संकटा साँघुरो जीत दर्ता गराउन सफल भएको हो । गुरुङ नै खेलको एएफयु म्यान अफ दी म्याच घोषित भए ।
पोष्टम्याच कन्फ्रेसनमा प्रतिक्रया दिँदै संकटाका प्रशिक्षक शैलेश कर्माचार्यले काँकडभिट्टामा र हेटौंडामा खेल जुत्दा समस्या भएको बताए । ‘दुवै प्रतियोगितामा क्लब सहभागी भएको छ । जसले गर्दा खेलाडी बाँडिएर सहभागी हुनु हाम्रो बाध्यता हो,’ उनले आगामी खेलमा थप खेलाडी ल्याउने प्रतिक्रिया दिए ।
भुटानका प्रशिक्षक कोता नामले आयोजकले ढिलो निम्तो गरेको कारण भिषा प्रोसेसले गर्दा क्लबमा रहेका दुई विदेशी खेलाडी र राष्ट्रिय टोलीका तीनजना खेलाडी प्रतियोगितामा उपलब्ध नभएको बताए । उनले मैदानको कारणले पनि खेलाडीलाई खेल्न समस्या भएको बताए ।

पुस २३ गतेसम्म सञ्चालन हुने प्रतियोतिगाअन्तर्गत् सेमिफाइनल प्रवेशका लागि मंगलबार सहारा क्लब पोखरा र भारतको दिल्ली युनाइटेडबीच खेल हुने आयोजक प्रतिष्ठान अध्यक्ष भेष खड्कीले जानकारी दिए ।