सन्डरल्यान्ड (एजेन्सी)– जेरमाइन डेफोले पेनाल्टीमा दुई गोल गर्दा खेलमा सन्डरल्यान्डसँग २–२ को बराबरीमा रोकिएपछि लिभरपुलले शीर्षस्थानको चेल्सीसँगको अंक दुरीलाई ३ मा घटाउने मौका गुमाएको छ ।

प्रिमियर लिगमा दोस्रो स्थानको लिभरपुलले दुई पटकको अग्रतालाई जोगाउन सकेन । डानियल स्टुरिजले १९ औं मिनेटमा हेडमार्फत गोल गर्दै अग्रता दिलाएपछि २५ औं मिनेटमा डेफोले बराबरी गोल गरेका थिए । रागनार क्लाभानले डिडिर एनडोङलाई फाउल हानेपछि सन्डरल्यान्डले पेनाल्टी पाएको थियो ।
साडियो मानेले ७२ औं मिनेटमा गोल गर्दै लिभरपुललाई अग्रता दिलाएपछि उनकै कारण सन्डरल्यान्डले अर्को पेनाल्टी पायो र बराबरी गोल फर्कायो । खेल सकिन ६ मिनेट बाँकी रहँदा पेनाल्टी बक्स भित्र मानेको ह्यान्ड भएपछि प्राप्त पेनाल्टीमा डेफोले गोल गर्दै टोलीलाई बराबरीमा पु¥याएका थिए ।

२० खेलमा दोस्रो स्थानको लिभरपुलको ४४ अंक पुगेको छ भने एक खेल कम खेलेको शीर्षस्थानको चेल्सीको ४९ अंक छ । दस खेलाडीमा सिमित हुनुका वावजुद बर्नलीलाई २–१ ले हराएको म्यानचेस्टर सिटी ४२ अंकका साथ तेस्रो स्थानमा छ ।

प्रिमियर लिगमा सोमबारका अन्य खेलमा एभर्टनले साउथ ह्याम्टनलाई ३–० ले, वेस्ट ब्रुमविचले हल सिटीलाई ३–१ ले हरायो भने मिडल्सब्रो र लेस्टरले गोलरहित बराबरी खेले । आजै म्यानचेस्टर युनाइटेड र वेस्ट ह्याम युनाइटेडबीच प्रतिस्पर्धा हुँदैछ ।