काठमाडौं (हाम्रो खेलकुद)– महिला साफ च्याम्पियनसिप फुटबलमा भाग लिन भारतको सिलगुढी पुगेको नेपाली महिला टोली बुधबार स्वदेश फर्कने भएको छ । सिलगुढीबाट झापा हुँदै विराटनगरबाट हवाईमार्ग हुँदै बुधबारसाँझ टोली त्रिभुवन विमानस्थल ओर्लने अखिल नेपाल फुटबल संघ (एन्फा) ले जनाएको छ ।
च्याम्पियन बन्ने लक्ष्यसहित नेपाली टोली यसपटक सेमिफाइनलबाटै बाहिरिएर स्वदेश फर्कन लागेको हो । आयोजक भारतसँग सोमबार ३–१ ले पराजित भएसँगै च्याम्पियनसिपमा नेपालको यात्रा टुंगिएको थियो । चौथो संस्करणमा आइपुग्दा नेपाल पहिलो पटक सेमिफाइनलबाट बाहिरिएको हो । यसअघि तीनै संस्करणमा नेपाल फाइनल पुगेको थियो । तीनै पटक फाइनलमा नेपाली टोली भारतसँग पराजित भएको थियो ।
समूह चरणमा दमदार प्रदर्शन गरेको नेपाल यसपटक पहिलो चोटी भारतसँग सेमिफाइनलमा भेट्नु परेको थियो । नेपालले समूह चरणमा भुटानलाई ८–०, माल्दिभ्सलाई ९–० र श्रीलंकालाई १–० ले हराएर समूह विजेता बनेको थियो । तर, यसपटक भारत समूह चरणमा उपविजेता बनेपछि नेपालसँग अन्तिम चारमा भेट भएको थियो ।
समूह बीमा भारतले अफगानिस्तानलाई ५–१ ले हराएको थियो भने अर्को खेलमा बंगलादेशले अफगानिस्तानलाई ६–० ले हराएको थियो । बंगलादेशसँग गोलरहित बराबरीमा रोकिएपछि समूह ‘बी’को उपविजेता भारतले समूह ‘ए’ को विजेता नेपालसँग अन्तिम चारमा प्रतिस्पर्धा गर्नु परेको थियो ।
तर, भारतले यसपटक पनि नेपालको यात्रामा पूर्णविराम लगाइदिएको छ । महिला फुटबलमा नेपालले अहिले सम्म भारतलाई हराउन सकेको छैन । नेपालले दक्षिण एसियामा हराउन नसकेको एकमात्र टोली भारत हो । यसअघि साफ च्याम्पियनसिपका ३ र दक्षिण एसियाली खेलकुद (साग) का दुई संस्करणको फाइनलमा नेपाललाई भारतले नै हराएको थियो ।
बंगलादेश पहिलो पटक साफ च्याम्पियनसिपको फाइनल पुग्न सफल भएको छ । सेमिफाइनलमा माल्दिभ्सलाई ६–० ले हराएको बंगलादेशले बुधबार हुने च्याम्पियनसिपको फाइनलमा भारतको सामना गर्नेछ ।
