काठमाडौं (हाम्रो खेलकुद) – खेलमा दुईपटक अग्रता लिएपनि त्यसलाई जोगाउन नसक्दा सातदोबाटो युथ क्लबले सहिद स्मारक ‘ए’ डिभिजन लिगमा हिमालयन शेर्पा क्लबसँग बराबरी खेलेको छ ।

च्यासल रंगशालामा आइतबार भएको सातदोबाटो र शेर्पाबीचको खेल २–२ गोलको बराबरीमा सकिएको हो । सातदोबाटोका लागि दुवै गोल दीपक राज सिंह ठकुरीले गर्दा शेर्पाका निशान लिम्बु र सुशील राईले बराबरी गोल फर्काए ।

खेल सुरु भएको ४६ सेकेण्डमै दीपकले गोल गर्दै सातदोबाटोलाई पहिलो हाफमा १–० को अग्रता दिलाए । पासाङ लामाको क्रसलाई अनमार्क रहेका दीपकल हेडरमार्फत सुन्दर फिनिस गरे ।

७२औं मिनेटमा परिवर्तित खेलाडी निशान लिम्बुले गोल गर्दै खेललाई १–१ गोलको बरारीमा ल्याए । फकुन्लेको लो क्रसमा निशाले गोलरक्षक अभिषेक बरालले बल भेट्नुअघि नै वान टचमै बललाई जाली चुमाए ।

८०औं मिनेटमा दीपकले व्यक्तिगत र टोलीका लागि दोस्रो गोल गर्दै सातदोबाटोलाई पुनः २–१ को अग्रता दिलाए । सारदोरवेकले आफैले गोल गर्न सक्ने अवस्था रहेपनि उनलाई दीपकलाई गोलका लागि असिस्ट दिए । जारी लिगमा उनको यो आठौं गोल हो ।

तर, सातदोबाटोको त्यो अग्रता लामो समय टिकेन । ८३औं मिनेटमा सुशील राईले आफ्नो पूर्व क्लबविरुद्ध गोल गर्दै शेर्पालाई हारबाट जोगाए । कप्तान विश्वास श्रेष्ठको लो क्रसमा सुशीलले एक डिफेन्डरबाट अघि बढ्दै गोल गर्न सफल भए ।

यस बराबरीसँगै सातदोबाटोले दोस्रो स्थानमा उक्लने मौका गुमाउँदा ११ खेलबाट १८ अंक जोडेर चौथो स्थानमा रहेको छ । समान १८ अंक नै रहेपनि चर्च ब्वाइज र थ्री स्टार गोलअन्तरमा दोस्रो र तेस्रोमा छ । शेर्पा ११ खेलबाट १० अंक जोडेर रेलिगेसन जोनको १३औं स्थानमा यथावत छ ।