काँकरभिट्टा,२१ ( हाम्रो खेलकुद)– एपिएफ र झापा ११ बीच मेची नेत्रालय काँकरभिट्टा गोल्डकप प्रतियोगिताको दोस्रो संस्करणको उपाधिको लागि प्रतिस्पर्धा हुने भएको छ । आयोजक काँकरभिट्टा फुटबल ट्रेनिङ सेन्टरलाई बिहीबार टाइब्रेकरमा ५—४ गोल अन्तरले हराउँदै एपिएफले स्थानिय झापा ११ सँगको फाइनल भेट पक्का गरेको हो । यी दुई टोलीबीचको खेलको निर्धारित समय १–१ को बराबरी टुंगिएको थियो ।
खेलको ४२ औँ मिनेटमा आयोजकका तर्फबाट निशान्त लिम्बुले गोल गरे । त्यसको २ मिनेट पनि वित्न नपाउँदै एपिएफका रमेश दंगालले बराबरी गोल फर्काएका थिए । टाइब्रेकरमा एपिएफका गोलरक्षक राजु योगी , मिलन केसी, नविन लामा, प्रविन स्याङ्गतामा सुदिप शिखाकरको प्रहार गोलमा परिणत भएको थियो । आयोजकका तर्फबाट सञ्जय राजवहाक, जीवन गुरुङ्ग, सेमसुङ्ग र आदित्य कार्कीको प्रहार गोलमा परिणत भयो । निर्धारित समयमा गोल गर्ने निशान्तको पेनाल्टीलाई एपिएफका गोलकिपर राजुले रोकेका थिए । राजुनै खेलको म्यान अफ दी म्याच चुनिए ।
उनले प्रतियोगिताको मुख्यः प्रायोजक मेची नेत्रालयका तर्फबाट उपलब्ध गराईको म्यान अफ द म्याचको पुरस्कार ५ हजार रुपैयाँसहित ट्रफी प्राप्त गरे । शनिबार हुने प्रतियोगिताको फाइनल खेलको विजेता टिमले ४ लाख १ हजार रुपैयाँ तथा दोस्रो हुने टोलीले २ लाख १ हजार रुपैयाँ प्राप्त गर्ने आयोजक काँकरभिट्टा फुटबल ट्रेनिङ सेन्टरका अध्यक्ष मिनबहादुर बस्नेत जानकारी दिए ।
