काठमाडौं (हाम्रो खेलकुद) – नेपाल सुपर लिग (एनएसएल) अध्यक्ष आश्रयता कार्की चौधरीले प्रधानमन्त्री पुष्पकमल दाहाल ‘प्रचण्ड’ समक्ष खेल क्षेत्रमा व्यवसायको सामाजिक उत्तरदायित्व कोषको (सीएसआर) रकम प्रयोग गर्नको लागि पहल गरिदिन ध्यानाकर्षण गराएकी छिन् ।

कोषको रकम खेल क्षेत्रमा प्रयोग गर्न सकिएमा त्यसले नेपाली खेल क्षेत्रमा सकारात्मक प्रभाव पार्ने अध्यक्ष चौधरीले बताइन् । उक्त अवसरमा उनले एनएसएल खेल क्षेत्रमा निजि क्षेत्रलाई जोडदै खेल र खेलाडीका लागि आवश्यक लगानी भित्र्याउने र उत्कृष्ट प्रतियोगिताको माध्यमबाट नेपालि खेल क्षेत्रलाई थप व्यावसायिक र अन्तर्राष्ट्रियकरण गर्न प्रयास गरिरहेको भन्नेबारे जानकारी गराइन् । उक्त अवसरमा एनएसएलका प्रबन्ध निर्देशक श्रेयान्स कार्की र सीइओ सुदिप शर्माको पनि उपस्थिति रहेको थियो ।

ध्यानाकर्षण पत्रमा खेलाडी र खेलकर्मीहरु खेलेर जिवन निर्वाह गर्ने वातावरण बनाउन व्यवसायहरुको समाजिक उत्तरदायित्वमा छुट्टाइएको रकमलाई खेलकुद क्षेत्रमा खेल र खेलाडीको प्रोत्साहनमा प्रयोग गर्न पाइने नियम लागु गर्न सकिएमा यस निर्णयले खेलकुद क्षेत्रमा लगानी बढन गई समग्र खेलकुद क्षेत्रलाई उकास्न सहयोगि सावित हुने जनाइएको छ ।

सरकार र निजि क्षेत्रको प्रत्यक्ष संलगनताबाट गरिने यो नविनतम प्रयासले नेपाली खेल क्षेत्र र खेलाडीहरुको स्तर उकास्ने र दिर्घकालिन रुपमा नेपाली खेल क्षेत्रले अन्तराष्ट्रिय रूपमै देशको नाम उच्च गर्न सफल हुने पत्रमा लेखिएको छ ।

एनएसएलले आफ्नो तर्फबाट खेल विकासमा गरेको प्रयासलाई निरन्तरता दिइरहने प्रतिवद्धता गर्दै सबै सरोकारवालाहरु संग एकतावद्ध भइ यस कार्यमा सम्मिलित हुन र आ-आफ्नो ठाउबाट आवश्यक पहल गरिदिनु हुन पनि अनुरोध पनि गरेको छ ।