एजेन्सी – ह्यामस्ट्रिङ चोटका कारण म्यानचेस्टर युनाइटेडका फ्रान्सेली फरवार्ड एन्थोनी मार्सियालले एफए कपको फाइनल गुमाउने भएका छन् ।

म्यानचेस्टर युनाइटेडले शनिबार म्यानचेस्टर डर्वीमा यो सिजनको प्रिमियर लिग च्याम्पियन म्यानचेस्टर सिटीसँग प्रतिस्पर्धा गर्दैछ । आइतबार ओल्ड ट्राफोर्डमा फुलहमविरुद्ध २–१ को जित निकालेको खेलमा मार्सियालले चोट बोक्न पुगेका थिए ।

मेडिकल रिपोर्टका अनुसार २७ वर्षीय मार्सियालको मांसपेशीमा चोट लागेको देखिएको क्लबले पुष्टि गरेको छ । लगातार चोटसँग जुधिरहेको मासिएयालले यो सिजन प्रिमियर लिगका २१ खेलमा ६ गोल र दुई असिस्ट दिएका छन् ।

शनिबार च्याम्पियन बन्न सके युनाइटेडले यो सिजन दोहोरो उपाधि जित्नेछ । युनाइटेडले फेब्रुअरीमा लिग कप जितेको थियो । युनाइटेड म्यानचेस्टर डर्वीमा सिटीलाई पराजित गर्दै सिटीको यो सिजन तेहोरो उपाधि जित्ने यात्रामा बाधक बन्न चहान्छ ।

सन् १९९९ मा सर एलेक्स फर्गुसनको युनाइटेडले ट्रेबल उपाधि जितेको थियो । प्रिमियर लिग च्याम्पियन सिटीले अर्को महिना च्याम्पियन्स लिगको फाइनलमा इटालियन क्लब इन्टर मिलानसँग खेल्नेछ ।

यस्तै युनाइटेडलाई अर्काे विंगर एन्टोनीको चोटले पनि सताउन सक्नेछ । चेल्सीमाथि ४–१ को जितमा एन्टोनीले चोट बोकेका थिए । यद्यपि, प्रशिक्षक एरिक टेन ह्यागले शनिबारको फाइनलको लागि एन्टोनी निको हुने बताएका छन् ।