एजेन्सी – फ्रान्सेली लिग वान च्याम्पियन पेरिस सेन्ट जर्मेन (पिएसजी) का प्रशिक्षक क्रिस्टोफ गाल्टिएरले टोलीका अर्जेन्टिनी फरवार्ड लियोनेल मेस्सीले यो सिजनको अन्त्यसँगै क्लब छाड्ने पुष्टि गरेका छन् ।

मेस्सीले पिएसजीका लागि आफ्नो अन्तिम खेल शनिबार क्लेरर्मन्टसँग खेल्ने प्रशिक्षक क्रिस्टोफ गाल्टिएरले बताएका छन् । पिएसजीमा ३५ वर्षीय अर्जेन्टिनी मेस्सीको सम्झौता यो सिजनको अन्त्यसम्म मात्रै छ ।

जुलाई २०२१ मा क्याटलान क्लब बार्सिलोनाबाट फ्रि ट्रान्सफरमा पिएसजी आएका मेस्सीले पीएसजीलाई लगातार दुई सिजन लिग वानको उपाधि जिताउन मद्दत गरेका छन् ।

‘मैले फुटबलको इतिहासमा उत्कृष्ट खेलाडीलाई प्रशिक्षण दिने सुअवसर पाएको छु ।’ गाल्टिएरले भने, ‘पार्क डेस प्रिन्सेसमा यो उनको अन्तिम खेल हुनेछ र मलाई आशा छ कि उसले न्यानो स्वागत गर्नेछ ।’

समर्थकको विरोधपछि पीएसजीले गत महिना मेस्सी, फरवार्ड नेयमार, मिडफिल्डर मार्को भेराट्टी र गाल्र्टिरको घरमा सुरक्षा बढाएको थियो ।

क्लबको अनुमतिविना साउदी अरब यात्रापछि पिएसजीले मेस्सीलाई दुई साताको लागि निलम्वन गरेको थियो । पछि उनले आफ्ना सहकर्मीसँग माफी मागेका थिए ।

मेस्सीले अर्जेन्टिनालाई २०२२ को विश्वकप जिताउन कप्तानी भुमिका निभाएका थिए । विश्वकपपछि पनि उनले पिएसजीमै बस्ने मनासय बनाएपनि पछिल्लो विकसित घट्नाक्रमपछि उनले पिएसजी छाड्ने निर्णयमा पुगेका हुन् ।

मेस्सी र पिएसजीले सन् २०२१ मा २ वर्षको सम्झौता गर्दा थप १ वर्ष सम्झौता गर्न सकिने उल्लेख गरिएको थियो । मेस्सीले यस सिजनमा पीएसजीका लागि सबै प्रतियोगितामा २१ गोल र २० असिस्ट दिएका छन् । क्लबका लागि समग्रमा ७४ खेलमा ३२ गोल गरेका छन् ।

पीएसजी पछिल्ला दुई सिजन च्याम्पियन्स लिगको अन्तिम १६ चरणबाट बाहिरिएको छ । स्पेनिस फुटबल लेखक गुइलम बालागुले मेस्सीले आफ्नो भविष्यको बारेमा छिट्टै निर्णय गर्ने तर उनले २१ वर्ष बिताएका क्लब बार्सिलोना फर्कने छैनन् भनेका छन् ।