काठमाडौं (हाम्रो खेलकुद)– दक्षिण एसियाको प्रतिष्ठित साफ च्याम्पियनसिपको आफ्नो दोस्रो खेलमा नेपाली राष्ट्रिय फुटबल टोलीले भारतीय टोलीको सामना गर्दैछ ।

कुवेतसँगको पहिलो खेल ३–१ ले गुमाएको नेपालका लागि च्याम्पियनसिपमा अघिल्लो चरणको सम्भावनालाई जीवन्त राख्न आयोजक भारतविरुद्धको खेल महत्त्वपूर्ण रहेको छ । साविक विजेता समेत रहेको भारतले जितबाट आफ्नो यात्रा सुरु गरेको थियो । पाकिस्तानमाथि ४–० को फराकिलो जित निकालेको भारतले विजय यात्रालाई निरन्तरता दिन सके अन्तिम खेल अघि नै सेमिफाइनल पुग्ने सम्भावना रहन्छ ।

नेपाल र भारतबीचको खेल अघि सोही समूहमा कुवेत र पाकिस्तानबीच प्रतिस्पर्धा हुनेछ । कुवेत र पाकिस्तानबीचको खेल नेपाली समय अनुसार दिउँसो ३:४५ बजे तथा नेपाल र भारतबीचको खेल साँझ ७ः४५ बजे सुरु हुनेछ ।

अर्को समूहमा लेवनान र माल्दिभ्सले जितबाटबाट यात्राको सुरुवात गरेका थिए । नेपाल, पाकिस्तान, भुटान र बंगलादेशले अंकको खाता खोल्न बाँकी छ । साफ च्याम्पियनसिपमा अहिले सम्म नेपालले एक पटक मात्र भारतलाई हराउन सकेको छ । सन् २०१३ मा स्वदेशमा भएको च्याम्पिनसिपको समूह चरणमा २–१ ले हराएको थियो ।

आठ पटकको च्याम्पियन रहिसकेको भारतलाई हराउन नेपाललाई सधै कठिन रहँदै आएको छ । साफ इतिहासमै गत संस्करणको फाइनल पुगेको नेपाल त्यति बेला पनि भारतसँग ३–० ले पराजित भएको थियो ।