सुबास हुमागाईं, काठमाडौं

अष्ट्रेलिया र न्युजिल्यान्डमा यसै साता फिफा महिला विश्वकप सुरु हुँदैछ । विश्वकपका लागि भएको छनोटको पहिलो चरण पार गर्न नसक्दा नेपाल विश्वकप पुग्न सकेन । तर मंगलबार एक कार्यक्रममा युवा तथा खेलकुद मन्त्री डिगबहादुर लिम्बुले नेपाली राष्ट्रिय महिला फुटबल टोलीलाई विश्वकपका लागि शुभकामना दिए ।

अखिल नेपाल फुटबल संघ (एन्फा) र युनिलिभरबीच महिला राष्ट्रिय टोलीलाई प्रयोजन सम्झौताका लागि आयोजित कार्यक्रममा मन्त्री लिम्बूले सो अभिव्यक्ति दिए । कार्यक्रममा मन्त्री लिम्बूअघि आएका वक्ताहरुले महिला टोलीको विश्वकप खेल्ने सम्भावना बारे चर्चा गरेका थिए ।

एन्फा अध्यक्ष पंकज विक्रम नेम्वाङले नेपाली महिला फुटबलले धेरै सम्भावना बोकेको चर्चा गरेका थिए । उनले सन् २०३१ सम्म विश्वकप खेल्नका लागि एन्फाले तयारी थाल्नेबारे अभिव्यक्ति दिए ।

त्यसपछि युनिलिभर नेपालका प्रबन्ध निर्देशक अम्लान मुखर्जीले पनि नेपाली महिला फुटबलको विकासमा आफ्नो संस्थाले पनि सहयोग गर्न पाएकोमा खुसी व्यक्त गरे । अंग्रेजीमा आफ्नो अभिव्यक्ति राखेका उनले विश्वकप खेल्ने स्तरसम्म पुर्याउन नेपाली महिला फुटबलमा आफ्नो संस्थाले सहयोग गर्ने प्रतिवद्धता व्यक्त गरे ।

अन्त्यमा मन्तव्य राख्न आएका युवा तथा खेलकुद मन्त्री लिम्बूले सुरुवातमै नेपाल सरकारले खेलकुदमा आवश्यकता अनुसार काम गर्न नसकेको स्वीकारे । त्यसपछि भने लिम्बूले आश्चर्यजनक अभिव्यक्ति दिए । उनले यसै साता अष्ट्रेलिया र न्युजिल्यान्डमा हुने विश्वकप खेल्न जान लागेको नेपाली महिला टोलीलाई शुभकामना पनि दिए ।

उनले भने, ‘अन्त्यमा तपाईं चेलीहरुले जति पनि मिहिनेत गरिरहनुभएको छ । तपाईंहरुले उत्कृष्ट प्रदर्शन गरिरहनुभएको छ । र तपाईंहरु अहिले फेरी पनि अष्ट्रेलिया जाने क्रममा हुनुहुन्छ, न्युजिल्यान्ड खेल्न जाने क्रममा हुनुहुन्छ । तपाईंहरु जित्न सक्नुहुन्छ भन्नेमा म पूर्ण विश्वास व्यक्त गर्न चाहन्छु ।’

मन्त्री लिम्बू दिउँसो १ बजेका लागि बोलाइएको कार्यक्रममा झन्डै १ घण्टा ढिलो उपस्थित भएका थिए । उनका कारण नै कार्यक्रम सुरु हुन् ढिलो भएको थियो । यसैपनि ढिलो कार्यक्रममा आएका मन्त्री लिम्बू आफू उपस्थित कार्यक्रम र त्यसको सेरोफेरोबारे अनभिज्ञ थिए । नेपालको सबैभन्दा ठूलो खेलमध्यको फुटबलबारे नै मन्त्रीलाई जानकारी नहुनु सामान्य होइन ।

अझ विश्वकप जस्तो महत्त्वपूर्ण प्रतियोगितामा छनोट भएको भए खेल जगतमा बेग्लै माहोल हुन्थ्यो । क्रिकेटको एसिया कपमै छनोट हुँदा पनि नेपाली खेलकुदमा त्यसको चर्चा हुन्छ । विश्वकप खेल्दा कस्तो होला? मन्त्री लिम्बूले त्यति पनि ख्याल गरेनन् ।

आफूभन्दा अघि बोलेका वक्ताहरुको अभिव्यक्तिको आशय पूरा नबुझी आफ्नै तरिका गैरजिम्मेवार अभिव्यक्ति दिनु बहालवाला मन्त्रीका लागि पक्कै शोभनीय थिएन । यसअघि पटक पटक युवा तथा खेलकुद मन्त्रीमा खेल सम्बन्धि ज्ञान नभएकोले आलोचना हुँदै आएको थियो । यसपटक मन्त्री लिम्बूको यो अभिव्यक्तिले पनि त्यस्तै संकेत दिएको छ ।