धनगढी (हाम्रो खेलकुद)– दुई ए डिभिजन टोली सिएमजी संकटा र लक्ष्मी हुन्डाई मनाङ मस्र्याङ्दी भागेश्वर गु्रप सुदूरपश्चिमाञ्चल खप्तड गोल्डकप फुटबल प्रतियोगिताको उपाधिका लागि भिड्ने भएका छन् । आयोजक सुदूरपश्चिमाञ्चल ११ लाई शुक्रबार १–० निराश पार्दै संकटाले मनाङसँगको फाइनल भेट पक्का गरेको हो ।
मनाङले अघिल्लो दिननै भारतको दिल्ली युनाइटेडलाई हराएर अन्तिम दुईको यात्रा तय गरिसकेको थियो । धनगढी रंगशालामा भएको दोस्रो सेमिफाइनलमा अमित तामाङको गोल खेलको निर्णायक बनेको थियो । ५ हजारभन्दा बढी घरेलु दर्शकको समर्थन पाएको सुदुरपश्चिमले खेलको धेरै समय बल नियन्त्रणमा राखेपनि गोलको खाता भने खोल्न सकेन ।
उता संकटाले खेलको १६ औं मिनेटमा गरेको अग्रतालाई जोगाउँदै फाइनल यात्रा निश्चित गरेको थियो । अमितले पेनाल्टी बक्सको बाहिरबाट फ्रिकिकमा गोल गरेका थिए । सुदुरपश्चिमका रक्षक नरेन्द्र चौधरीले विपक्षी खेलाडी फाउल हानेपछि संकटाले फ्रिकिक पाएको थियो ।
घरेलु टोलीका कप्तान गजेन्द्र शाही, सुमित दुवे, मणिराम चौधरीले गरेको प्रहारलाई संकटाका गोलकिपर राजु नगरकोटीले रोक्दै टोलकिो अग्रतालाई जोगाएका थिए । राजु खेलेको म्यान अफ दी म्याच बने भने ५ हजार रुपैयाँसहित एक थान मोबाइल प्राप्त गरे । संकटाका प्रशिक्षक सल्यान खड्गीले रणनीति अनुसारकै प्रदर्शन गरेकाले सफल नतिजा निकाल्न सकेको बताए । संकटाका कप्तान रवि सिलवालले हारका वावजुद घरेलु टोलीले उच्च प्रदर्शन गरेको बताए ।
सुदूरपश्चिमका कप्तान गजेन्द्र राम्रो खेले पनि गोल गर्नबाट चुक्दा घरेलु मैदानमा फाइनल पुग्न नसकेको बताए । टोलीका व्यवस्थापक शिसिर हमालले भाग्यको साथ नरहेका कारण हार्नु परेको बताए । शनिबार हुने फाइनलको विजेताले ५ लाख र दोस्रो हुने टोलीले २ लाख ५१ हजार रुपैयाँ पाउनेछन् भने उत्कृष्ट खेलाडीले मोटरसाइकल प्राप्त गर्नेछन् ।
