धनगढी (हाम्रो खेलकुद) – आज दिउसो हुने खप्तड गोल्ड कपको फाइनल खेलमा दुइ ए डिभिजन क्लब मनाङ मर्श्याँग्दि क्लब र संकटा क्लब आमनेसामने हुँदै छन्।
जारी सिजनमा कुनै उपाधि जित्न नसकेको मनाङ मर्श्याँग्दी क्लब गत सातामात्र हेटौंडा गोल्डकपमा त्रिभुवन आर्मी क्लबसंग पराजित भएको थियो। उता संकटाले भने केहि महिना अघि मात्र विकास रनिङ शिल्डको फाइनलमा त्रिभुवनआर्मीलाई हराउदै उपाधि जितेको थियो।
प्रतियोगिताको सेमीफाइनलमा मनाङले दिल्ली युनाईटेडलाइ पराजित गरेको थियो भने संकटाले हिजो मात्र आयोजक सुदुरपश्चिम एघारलाई हराएर फाइनलमा स्थान बनाएको थियो।
मनाङमा अधिकांश राष्ट्रिय टोलीका खेलाडी भएपनि उसले हाल कुनै उपाधि जित्न सकेको छैन। हेमन गुरुङ, रुपेश केसी, बिमल घर्ति मगर जस्ता खेलाडीहरुले पनि साथ छोडेको मनाङमा अहिले नयाँ खेलाडीको बाहुल्यता छ। किरण चेम्जोङ माल्दिभ्स गएसंगै क्लबले दिनेश थापा मगरलाइ भित्र्याएको छ।
उता संकटाले भने फाइनल खेलको लागि राष्ट्रिय टोलीका मिडफिल्डर राजेन्द्र रावल र एपीएफका भरपर्दा डिफेन्स सुदिप शिख्रकारलाई टोलीमा समावेश गरेको छ। क्लबकै पुर्व खेलाडी सल्यान खड्गी हाल प्रशिक्षकको भूमिका निभाउदै छन्।
प्रतियोगिताको विजेता टोलिले नगद रु. पाँच लाख जित्नेछ भने उपविजेताले २ लाख ५१ हजार पाउनेछ।
