काठमाडौं (हाम्रो खेलकुद)– राष्ट्रिय टोलीका कप्तान अनिल गुरुङले सुदूरपश्चिमाञ्चल पुगेर फर्ममा फर्कने संकेत गरेका छन् । कप्तान हुनाका वावजुद राष्ट्रिय टोलीमा कमै अवसर पाएका अनिलले क्लब वा क्षेत्रिय टोलीबाट पनि खासै राम्रो प्रदर्शन गर्न सकिरहेका थिएनन् । आफ्नो प्रदर्शनले उनलाई केही निराश पनि बनाएकै थियो ।

दुई महिना अघि मलेसियाबाट फर्कदा नेपाल एएफसी सोलिडारिटी कपको च्याम्प्यिन बनेर फर्केको थियो । अनिलनै कप्तान हुँदा नेपालले आफ्नो फुटबल इतिहासमै सबैभन्दा ठूलो सफलता प्राप्त गर्ने क्रममा पहिलो पटक एसियाली फुटबल महासंघ (एएफसी) को आधिकारिक प्रतियोगिता थियो । आफै कप्तान रहँदा टोलीले सफलता पाउँदा उनी दंग थिए, तर मौका कम पाउने र मौका पाउँदा क्लब फुटबलमा पनि सम्झनलायक प्रदर्शन गर्न नसक्दा अनिलको मन अमिलो हुन्थ्यो । तर, उनी हिम्मत हार्ने मध्येका खेलाडी होइनन् ।

पोखराबाट खेल जीवनसुरु गेरर, राजधानी, आइ (भारतीय) लिग हुँदै ट्रायल सम्भावना खोजीका लागि बेलायत सम्म पुगेका अनिलले धैर्यता भने गुमाएका थिएनन् । सोलिडारिटी कपबाट फर्केपछि उनले पूर्वमा भएको सातौं राष्ट्रिय खेलकुदमा पश्चिमाञ्चलको कप्तानी गरे । तर उनको टोली सेमिफाइनल पुनि पुग्न सकेन ।

सातौं पछि टुबोर्ग हेटौडा गोल्ड कप खेल्न उनको नेतृत्वमा लक्ष्मी हुन्डाई मनाङ मस्र्याङ्दी क्लब हेटौडा पुगेको थियो । पुस २३ मा भएको फाइनलमा मनाङ पराजित भयो । त्यहाँ पनि अनिलको व्यक्तिगत प्रदर्शन खासै राम्रो भएन । त्यसपछि उनको टोली खप्तड गोल्डकप खेल्न सुदूरपश्चिम पुग्यो । जहाँ अनिलले सफलताको नयाँ कथा लेख्न सफल भए । शनिबार सिएमजी संकटालाई हराएर मनाङ च्याम्पियन बन्दा अनिल त्यसको मुख्य नायक बने । फाइनलमा उनकै गोलले विजेता बन्यो । त्यसमा मात्र होइन सेमिफाइनलमा पनि उनले टोलीलाई जित दिलाउँदै फर्ममा फर्केको संकेत गरेका छन् । अनिलले फर्ममा फर्केको संकेत गर्दा मनाङले बर्षको पहिलो उपाधि जितेको छ ।

‘यो सफलताले टोलीको मनोबल पुनः उच्च बनाएको छ’ अनिलले हाम्रो खेलकुदसँग भने,‘व्यक्तिगत रुपमा मेरो लागि पनि यो खप्तड गोल्डकपको प्रदर्शन यादगार रह्यो । यो सफलताका लागि म टोलीका सबैलाई बधाई दिन चाहन्छु ।’

पहिलो पटक सुदूरपश्चिम पुग्दा त्यहाँको फुटबल क्रेज देखेर अनिल दंग परेका छन् । ‘यहाँको फुटबल क्रेज देखेर म त छक्क परे ’ धनगढीबाट काठमाडौं फर्केर घरेलु सहर पोखरामा आहा रारा गोल्डकप खेल्ने तयारीमा रहेका उनले भने, ‘यहाँ फुटबल यति लोकप्रिय होला भन्ने मलाई लागेको थिइन् । यो माहोल अझै बढ्दै जाओस् भन्ने मेरो कामना छ । देशभरी फुटबलको माहोल बनेको देख्दा आनन्द लाग्छ ।’

पछिल्ला दुई बर्षयता नेपालको घरेलु फटबल अझ विशेष गरि लिग हुन नसक्दा खेलाडीमा निराशा आएको अनिलको ठम्माई छ । ‘ देश भित्र फुटबल जति चलाएमान हुन्छ, त्यसमै खेलाडीले पारिश्रमिक पाउने सम्भवना रहन्छ,’ उनले थपे, ‘तर लामो समय लिग नहुँदा खेलाडीको नियमित आम्दानी पनि छैन । फुटबल नै नियमित नहुँदा खलाडीको अभ्यास नियमित हुन्न फिटनेस पनि कम हुन्छ ।’

अहिले मोसफलमा नकआउट प्रतियोगिता एक पछि अर्को भएपनि खेलाडीका लागि खासै उत्साहजनक हुन नसकेको बताउँछन् । ‘अहिले कोही खेलाडी पनि क्लबमा आबद्ध छैनन्’ उनले ‘नकआउटमा निश्चित रकम लिएर खेलेका छौं । यसलाई व्यवसायिक फुटबल भन्न मिल्दैन । लिग नियमित नहुदा सम्म क्लबले खेलाडीलाई नियमित पारिश्रमिक दिदैनन् । यसरी सधै फुटबल चल्न सक्दैन । एन्फाको ध्यान यसमा जानुपर्दछ ।’