म्यानचेस्टर (एजेन्सी) – इङ्गलिश प्रिमिएर लिग अन्तर्गत आइतबार भएको म्यानचेस्टर युनाईटेड र लिभरपुलबिचको खेल १-१को बराबरीमा टुंगिएको छ।
खेलको पहिलो हाफमा जेम्स मिल्नरको पेनाल्टीबाट अग्रता लिएको लिभरपुलले दोश्रो हाफको अन्त्यतिर ज्लाटन इब्राहिमोभिचको गोलले अंक बाड्न बाध्य भएको थियो। पल पोग्बाले पेनाल्टी बक्सभित्र हातले बल छोएपछि लिभरपुलले पेनाल्टीको मौका पाएको थियो। यस सिजन छैठौं पटक पेनाल्टी लिएका लिभरपुलका मिल्नरले जारि सिजनको आफ्नो शत प्रतिशत गोलको क्रमलाइ जारी राखे।
जितसंगै दोश्रो स्थानमा उक्लन तत्पर भएको लिभरपुललाई ज्लाटनको गोलले अंक बाँडनु परेको थियो। ज्लाटनले एन्टोनियो भ्यालेन्सियाको क्रसलाई सदुपयोग गर्दै हेडीङ्ग मार्फत गोल गरेका थिए।
यस बराबरीले लिभरपुलको ४५ अंक भएको छ र गोल अन्तरका आधारमा स्पर्सभन्दा पछाडी तेश्रो स्थानमा रहेको छ। म्यानचेस्टर युनाईटेड भने छैठौं स्थानमा यथावत छ। लिगको शिर्ष स्थानमा ५२ अंक जोडेको चेल्सी रहेको छ।
