हाङ्गचौ (हाम्रो खेलकुद) – नेपाली महिला राष्ट्रिय फुटबल टोलीले १९ औं एसियाली खेलकुद अन्तर्गत समूह डी को पहिलो खेलमा भिएतनामसँग हार बेहोरेको छ ।

पहिलो हाफ गोलरहित बराबरी खेलेको नेपालले दोस्रो हाफमा भने २ गोल खाएसँगै २-० को हार बेहोरेको हो । भिएतनामका लागि ५३ औं मिनेटमा फाम हाइ एनले गोल गरेकी थिइन् । थि बीच थुइले पेनाल्टी क्षेत्र बाहिरबाट गरेको प्रहार गोलरक्षक एन्जिलाले बचाएपनि रिबाउन्डमा भने उनी बिट भएकी थिइन् ।

त्यसको १० मिनेटपछि अघिल्लो गोल सिर्जना गरेकी थि बीच थुइले गोल गरिन् । बायाँ विंगबाट आएको क्रसलाई उनले पेनाल्टी क्षेत्रभित्र डाइभमार्फत हेडरमा गोल गर्दै २-० को अग्रता दिलाइन् ।

प्रशिक्षक बालगोपाल महर्जनले रेनुका नगरकोटेको कप्तानीमा पहिलो रोजाइमा ५ डिफेन्डर उतारेका थिए । पहिलो हाफमै सरु लिम्बु घाइते भएपछि उनको स्थान प्रिती राईले लिएकी थिइन् । ३० औं मिनेटमा बल खोस्ने प्रयासमा उनको घुँडामा चोट लागेको थियो ।

सुरुवाती रोजाइको डिफेन्समा पुजा राना, समिक्षा घिमिरे, अमृता जैशी, गीता राना र हिरा भुजेल खेल्दा मिडफिल्डमा सरु र रेनुका खेलेका थिए । आक्रमणको जिम्मेवारी पाएकी सावित्रा भण्डारीलाई दिपा शाही र अमिषा कार्कीले साथ दिएका थिए ।

नेपालले अब सोमबार समूहको दोस्रो खेलमा जापानको सामना गर्नेछ । समूहको अन्तिम खेल बंगलादेशसँग विहीबार हुनेछ । हरेक समूहबाट शीर्ष टोली र उत्कृष्ट ३ उपविजेता अघि बढ्नेछन् ।

भिएतनामविरुद्ध नेपालको टोली : एन्जिला तुम्बापो सुब्बा (गोलकिपर), हिरा भुजेल, अमृता जैशी, गीता राना (७२’ विमला चौधरी), समिक्षा घिमिरे, पुजा राना, रेनुका नगरकोटे (कप्तान), सरु लिम्बु (३२’ प्रिती राई (८७’ अनिता केसी)), दिपा शाही (७२’ रेखा पौडेल), अमिषा कार्की, सावित्रा भण्डारी

यो पनि : टेबल टेनिसमा हार, रुविनले जापानी खेलाडीविरुद्ध‌ सेट जिते