एजेन्सी – बेल्जियन फुटबलर इडेन हाजार्डले ३२ वर्षको उमेरमा व्यवसायिक फुटबलबाट सन्न्यासको घोषणा गरेका छन् । सामाजिक सञ्जालमा मार्फत उनले सन्न्यास घोषणा गरेका हुन् ।

चार वर्षमा रियल म्याड्रिडका लागि ७६ खेल खेलेका उनी यसै जुन महिनामा कन्ट्रयाक्ट सकिएपछि क्लब विहिन थिए । रियल छोडेपछि उनले सन्यासको संकेत गर्दै आएका थिए । अन्ततः ३२ वर्षको उमेरमा उनले व्यवसायिक फुटबल छाडेका हुन् ।

केही इंग्लिस क्लबहरुले उनलाई ल्याउन उत्सुकता देखाएपनि उनको चोट इतिहासका कारण भित्राएनन् । सन् २०१९ मा १ सय २० मिलियन युरो ट्रान्सफर फिमा उनी इंग्लिस क्लब चेल्सी बाट रियल पुगेका थिए । तर पहिलो सिजन देखि नै उनको रियल बसाई चोट कारण सहज हुन सकेन ।

इन्स्टाग्राममा लामो पोस्ट मार्फत, पूर्व चेल्सी स्टारले खेलबाट सन्न्यास लिने निर्णय सार्वजनिक गरेका हुन् । उनले लेखेका छन्,‘ तपाईंले आफैलाई सुन्नुपर्छ र सही समयमा रोकिनु पर्दछ । १६ वर्ष र ७ सय भन्दा बढी खेल खेलेपछि मैले व्यावसायिक फुटबलरको रूपमा करियर अन्त्य गर्ने निर्णय गरेको छु । म आफ्नो सपना साकार गर्न सफल भए । मैले विश्वका धेरै रंगशालामा खेलेको र रमाइलो गरेको छु । मेरो खेल जीव्नमा उत्कृष्ट प्रशिक्षकहरू साथीहरूलाई भेट्न पाउँदा भाग्यशाली रहे । यी उत्कृष्ट समयको लागि सबैलाई धन्यवाद, म तपाईंहरू सबैलाई मिस गर्नेछु ।’

हाजार्डले गत वर्ष विश्वकप पछि अन्तराष्ट्रिय फुटबलबाट सन्न्यास लिइसकेका थिए। रियलको चार वर्ष बसाईमा उनले च्याम्पियन्स लिग, क्लब विश्वकप, युरोपेली सुपर कप, दुई ला लिगा उपाधि, एक कोपा डेल रे र दुई स्पेनिस सुपर कपको उपाधि जिते । रियलमा ७६ खेलमा उनको ७ गोल मात्र गर्न सके ।

उनी २०१२ मा चेल्सी गएका थिए । उनले चेल्सीका लागि ३ सय ५२ खेलमा १ सय १० गोल गरेका थिए । २००८ मा लक्जमबर्ग विरुद्ध आफ्नो अन्तर्राष्ट्रिय डेब्यू गरेका हाजार्डले १ सय २६ खेलमा बेल्जियमका लागि ३३ गोल गर्दा ५६ खेलमा राष्ट्रिय टोलीको कप्तानी समेत गरेका थिए ।