काठमाडौं (हाम्रो खेलकुद) – एफसी चितवन विरुद्ध आइतबार जित दर्ता गर्दै उपाधि दाबेदार मध्येको एक ललितपुर सिटी एफसी नेपाल सुपर लिग (एनएसएल) को पहिलो स्थानमा उक्लिएको छ ।

आफ्नो अपराजित यात्रा कायम गर्ने क्रममा ललितपुरले चितवन माथि ३-१ को जित निकाल्दै तालिकाको शीर्ष स्थानमा उक्लिएको हो । ललितपुरको जितमा पापा केबेले २ र विवेक पौडेलले १ गोल गरे ।

दोस्रो संस्करण सुरू हुनु अगावै उपाधि दाबेदार मानिएका यी दुई टोलीको खेल प्रतिस्पर्धात्मक नै रहेको थियो । बल पोसेसन दुबै टोलीको बराबर जस्तै देखिएको थियो । तर ललितपुरले आफ्नो मौका हरुको सदुपयोग गर्दै जित हासिल गर्दा चितवनलाई भने स्पष्ट मौकाहरु नै बनाउन हम्मे-हम्मे परेको थियो ।

खेलको पहिलो अवसर भने चितवनले सिर्जना गरेको थियो तर अमिनुले प्रहार गर्नु अघि अनन्त तामाङले बल क्लियर गरिदिए । सातौं मिनेटमा चितवनले अर्को मौका बनायो । विमल घर्तीमगरले अमिनुलाई दिएको पासमा अमिनुले रोशन राना मगरलाई स्पेशमा दिएको पासमा उनको प्रहार सनिश श्रेष्ठले ब्लक गरे ।

सनिशलाई त्यसपछि केही मेडिकल सहायता चाहिएको थियो । उनी चोटग्रस्त देखिएपनि फिजियोको उपचारपछि मैदानमै रहे । १३औं मिनेटमा ललितपुर गोलरक्षक बाल्टुसको लामो पास चितवनले क्लियर नगरेपछि दिनेश हेन्जनलाई अवसर सृजना भएको थियो तर उनको प्रहार गोलकिपर विशाल श्रेष्ठले कर्नरका लागि फालिदिए ।

१५औं मिनेटमा इमोहको क्रसमा केबेले बक्स भित्रबाट प्रहार गर्न सकेनन् । १८औं मिनेटमा चितवनले डिफेन्स लाईनमा मिसपास खेलेपछि इमोह इजिकिएलले पाएको बलमा पापा केबेलाई पास दिए तर उनको प्रहार विशालले बचाए ।

अर्को मिनेटमा भने ललितपुरले खेलमा अग्रता लियो । पहिलो केही खेलमा चोटका कारण सुरुवाती ११ मा नरहेका केबेले गोल गर्दै अग्रता दिलाएका थिए । उनले दिनेश हेन्जनको क्रसमा गोलपोस्टको नजिक बाट गोल गरेका थिए ।

२७औं मिनेटमा निखिलको बक्स बाहिरबाट लिएको प्रहार युसुफ मुबारकले ब्लक गरे । २९औं मिनेटमा विमलको प्रहार ललितपुर गोलरक्षक बाल्टुसले बचाउ गरे ।

३१औं मिनेटमा अमिनुले एकल रन बनाउँदै बक्स भित्रबाट स्पेश बनाएर गरेको प्रहार सिधै बाल्टुसलाई लाग्न पुग्यो । ४०औं मिनेटमा इमोहलाई बक्स बाहिर फाउल गरेपछि ललितपुरले मुबारकको लागि रातो कार्डको अपिल गरेको थियो तर रेफ्रीले पहेँलो कार्ड मात्र दिए ।

४५औं मिनेटमा इमोहको प्रहार युसुफलाई लागेर क्रसबारको माथिल्लो भागमा लागेर बाहिरिन पुग्यो र ललितपुर अग्रता दोब्बर बनाउन बाट चुक्यो ।

दोस्रो हाफको पहिलो मौका चितवनका उत्सव राईले बनाए । उनको प्रहार डिफ्लेक्ट भएर बाहिर जन पुग्यो । ४९औं मिनेटमा दिनेशको क्रसमा इमोहको हेडर सिधै विशालको हातमा जान पुग्यो ।

५७औं मिनेटमा भने ललितपुरले दोस्रो गोल गर्यो । दिनेशको क्रस बक्सबाट क्लियर भएपछि बक्सको केही बाहिरबाट विवेक पौडेल शानदार भली प्रहार गर्दै ललितपुरले अग्रता दोब्बर बनायो । विवेकको त्यो प्रहारमा विशालले रोक्ने कुनै मौका पाएनन् ।

दोस्रो गोल खाएपछि भने चितवनले केही अवसरहरू बनायो । ६५औं मिनेटमा अफ्रिएको फ्रिकिक पोस्टको माथिबाट बाहिरियो । ६७औं मिनेटमा टोरिकको प्रहारले पोस्टको दिशा लिन सकेन ।

६९औं मिनेटमा दिनेशको क्रसमा इमोहको हेडर पोस्टतर्फ जान सकेन । ७१औं मिनेटमा चितवनका नवयुग श्रेष्ठले बक्स बाहिरबाट गरेको प्रहार बाल्टुसले बचाए । ७३औं मिनेटमा टोरिकको क्रस ओमोलाजा करिमले राम्रो क्लियरेन्स गर्दै पोस्टको माथिबाट बाहिर फालिदिए ।

८९औं मिनेटमा चितवनले एक गोल फर्कायो । करिमले क्लियर गर्न खोज्दा अमिनु भाग्यशाली बन्दै उनलाई अवसर सिर्जना भयो र उनले गोल गर्दै चितवनलाई खेलमा फर्काए ।

तर अर्को मिनेटमै ललितपुरले पेनाल्टी पायो । उत्सव दाहालले बक्समा आदित्य शाक्यमाथि फाउल गरेपछि ललितपुरलाई जित सुनिश्चित गर्ने अवसर प्राप्त भयो । पेनाल्टीमा केबेले कुनै गल्ती गरेनन् र ललितपुरका लागि जित सुनिस्चित गरे ।

थपिएको समयको चौथो मिनेटमा दुबै टोलीले पोस्टमा प्रहार गरे । पहिले अमिनुले बक्सको बायाँ भाग बाट गरेको प्रहार पोस्टमा लागेर फर्कियो । अर्कोतर्फ काउन्टरमा ललितपुरका केबेले पनि क्रसबारमा प्रहार गर्दा ह्याट्रीक पूरा गर्न सकेनन् ।

जित पछि पहिलो स्थानमा पुगेको ललितपुरको ५ खेलमा ९ अंक पुगेको छ । पराजित चितवन भने ५ खेलमा ५ अंकका साथ पाँचौं स्थानमै छ ।