काठमाडौं (हाम्रो खेलकुद) – नेपाल सुपर लिगको दोस्रो सिजन अन्तर्गत आज दुई खेल हुँदैछन् । दिनको पहिलो खेलमा दिउँसो १ बजे वीरगन्ज युनाइटेडले पोखरा थन्डर्ससँग खेल्नेछ भने दोस्रो खेलमा चितवनले स्पोर्टिङ इलामसँग दिउँसो ५ बजे खेल्नेछ ।

वीरगन्जले प्लेअफको आशा जीवित राख्ने हो भने जित दर्ता गर्नुपर्नेछ। पोखराले आज जित दर्ता गर्न सके तालिकाको शीर्ष स्थानमा उक्लने सम्भावना रहने छ । पछिल्लो खेलमा पोखराले काठमाडौंसँगको खेलको अन्तिम मिनेटमा हार बेहोरेको थियो । काठमाडौंसँगको त्यो हार पोखराको सिजनको पहिलो हार थियो ।

अर्कोतर्फ, अघिल्लो खेलमा इलामलाई अन्तिम मिनेटमा पेनाल्टी गोलको सहयोगले हराउँदै वीरगन्जले नेपाल सुपर लिगमा पहिलो जित दर्ता गरेको थियो । खेलको अन्तिम मिनेटमा इलामले पेनाल्टी पाएपछि खेल विवादले भरिएको थियो । यो निर्णयले इलामका खेलाडीहरु आक्रोशित हुनुका साथै झडप समेत भएको थियो ।

हालसम्म कमजोर नतिजा निकालेको एफसी चितवनले प्लेअफको सम्भावना कायम राख्न आज जित दर्ता गर्नुपर्नेछ । आज इलामका कप्तान विकेश कुथु अनुपस्थित हुँदा समित श्रेष्ठले गोलरक्षकको भूमिकामा खेल्ने देखिन्छ । इलामको भने प्लेअफ पुग्ने समीकरण आफ्नो नियन्त्रणमा छैन ।

सिजन सुरु हुनुअघि नै चितवनलाई उपाधिको दावेदारको रुपमा लिइएको थियो । तर, दुई खेलमा अन्तिम समयमा गोल खाँदै बराबरीमा रोकिएपछि चितवन कठिन अवस्थामा पुगेको छ । पछिल्लो खेलमा धनगढी विरुद्ध हार बेहोरेपछि चितवन झन् गाह्रो अवस्थामा पुगेको छ ।

एनएसएलको सम्पूर्ण जानकारी यहाँ