काठमाडौं (हाम्रो खेलकुद) – नेपाल सुपर लिग (एनएसएल ) मा शनिबार दशरथ रंगशालामा जारी दिनको दोस्रो खेलमा एफसी चितवन र स्पोर्टिङ्ग इलाम एफसी बीचको खेल पहिलो हाफ गोलरहित सकिएको छ ।

चितवनले आजको खेलमा दुई परिवर्तन गरेको छ । विदेशी डिफेन्डर मार्को इभानोभिचको स्थान विक्रम धिमालले लिँदा नवयुग श्रेष्ठको स्थानमा रोशन राना मगर सुरुवाती ११ मा फर्किएका छन् ।

उता इलामले भने तीन परिवर्तन गरेको छ । गत खेलमा निलम्बनमा परेका कप्तान विकेश कुथुको स्थान समित श्रेष्ठले लिएका छन् भने ओमार थिओम र आशिष चापागाईंको स्थानमा सौरभ लिम्बु र नवीन लामा टोलीमा आएका छन् ।

दोस्रो मिनेटमा नै चितवनका रफिक अमिनुको प्रहार समितले सहजै समाते । छैठौं मिनेटमा चितवनका छिरिङ गुरुङको क्रसले कोही सहकर्मी भेटाउन सकेन ।

१२औं मिनेटमा इलामका फोडे कमाराको क्रसले पनि कसैलाई भेटाउन सकेन । २६औं मिनेटमा चितवनका टोरिक जेब्रिनले बक्स बाहिरबाट गरेको प्रहार पोस्टको केही माथिबाट बाहिरियो ।

३०औं मिनेटमा इलामका नवीन लामाको प्रहार पनि पोस्ट माथिबाट बाहिरियो । ४५औं मिनेटमा चितवनले ठूलो मौका खेरा फाल्यो । अफ्रीए अक्वाहको बक्स बाहिरबाट लिएको प्रहार रोशन राना मगरको खुट्टामा लागेर अमिनुको खाली रहेको अवस्थामा उनको खुट्टामा पुगेको थियो । तर उनको प्रहार सिधै समितको ज्यानमा लाग्न पुग्यो ।

चितवन अहिलेसम्म खेलेको ६ खेलमा ५ अंक जोड्दै सातौं स्थानमा रहँदा इलाम भने समान ६ खेलमा ४ अंकसहित पुछारमा छ ।

आजको पहिलो खेलमा पोखरा थन्डर्सले वीरगन्ज युनाइटेड एफसी लाई २-१ ले हराएको थियो ।