काठमाडौं (हाम्रो खेलकुद) – नेपाल राष्ट्रिय फुटबल टोलीका कप्तान किरण चेम्जोङले भारतको पहिलो श्रेणीको लिग इन्डियन सुपर लिग (आईएसएल) मा पहिलो जित दर्ता गरेका छन् ।

किरण सम्मिलित पन्जाब एफसीले चेन्नाईन एफसी विरुद्ध १-० को जित निकाल्दै आइएसएलमा क्लब इतिहासकै पहिलो जित दर्ता गरेको हो ।

पन्जाबको जितमा मादिह तलालले खेलको एकमात्र गोल गरे । किरणले खेलको पुरै निर्धारित समय खेल्दै क्लिन सिट समेत राख्न सफल भए । यस सिजनको बीचमा केही खेल नखेलेका किरणले पछिल्लो तीन खेलमा पहिलो रोजाइमा फर्कंदै टोलीमा पुनरागमन गरेका थिए । उनले यसबीचमा इस्ट बङ्गालविरुद्ध गोलरहित बराबरी खेल्दा क्लिनसिट पनि राखिसकेका थिए ।

गत सिजनको आई-लिग उपाधि जित्दै पंजाब पहिलो श्रेणीमा बढुवा हुने पहिलो टोली बनेको थियो । किरण पन्जाबमा सम्झौता नविकरण गर्दै अनन्त तामाङ पछि उनी आइएसएल खेल्ने दोस्रो नेपाली खेलाडी समेत बनेका थिए । अनन्तले यसअघि इस्ट बंगालबाट आइएसएल खेलेका थिए ।

आइएसएलमा यस सिजन सम्म रेलिगेसनमा कुनै टोली पर्ने छैन । अखिल इंडिया फुटबल महासंघ (एआईएफएफ) ले २०२४-२५ को सिजन बाट मात्र बढुवा र घटुवा गराउने तयारी गरेको छ ।

पन्जाब ११ खेलमा १ जित, ५ बराबरी र ५ हारसहित तालिकाको १०औं स्थानमा उक्लिएको छ । यसमा किरणले ६ खेल सुरुवात गर्दै १ जित, २ बराबरी र ३ हारको नतिजा निकालेका छन् ।