काठमाडौं (हाम्रो खेलकुद) – दोस्रो संस्करणको नेपाल सुपर लिगमा आजका लागि दुई खेल तय भएका छन् । दिनको १ बजे दशरथ रंगशालामा हुने पहिलो खेलमा स्पोर्टिङ्ग इलाम एफसी र ललितपुर सिटी एफसी बीच प्रतिस्पर्धा हुनेछ ।

यी दुई टोलीको यस संस्करणको यात्रा एकदमै बेग्लै छ । ललितपुर आजको खेलमा जित हासिल गर्न सकेमा पहिलो स्थानमा उक्लिनेछ । शीर्ष दुईमा रहेर प्लेअफमा आफ्नो स्थान बनाउने सम्भावना बलियो हुनेछ । तेस्रो स्थानमा रहेको ललितपुरको ६ खेलमा १० अंक रहेको छ । शीर्ष स्थानमा रहेको धनगढीका समान ६ खेलमा १२ अंक छ ।

उता इलाम भने प्लेअफमा पुग्ने दौड बाट बाहिरीसकेको छ । आज नवप्रवेशी टोली इलामको यस संस्करणमा अन्तिम खेल हो । ७ खेल खेल्दासम्म पुछारमा रहेको इलामको ५ अंक मात्र रहेको छ ।

आज दिनको दोस्रो खेलमा ५ बजे बुटवल लुम्बिनी एफसी र पोखरा थन्डर्स भिड्ने छन् । पोखरा ६ खेलमा ११ अंकसहित दोस्रो स्थानमा रहँदा बुटवल भने समान ६ खेलमा ७ अंक जोड्दै छैठौं स्थानमा छ । अर्को खेलको नतिजा आफ्नो पक्षमा भएमा पोखरा आज शीर्ष स्थानमा उक्लिन सक्ने सम्भावना रहेको छ । उता बुटवल भने आज जित हासिल गर्दै प्लेअफमा पुग्ने आफ्नो सम्भावना बलियो बनाउन चाहन्छ ।