एजेन्सी – प्रिमियर लिग प्रतिद्धन्द्धी न्यूक्यासल युनाइटेडलाई टाइब्रेकरमा पराजित गर्दै लन्डन क्लब चेल्सी इएफएल कपको सेमिफाइनलमा प्रवेश गरेको छ ।

चेल्सीले न्यूक्यासललाई टाइब्रेकरमा ४–२ ले पराजित गर्दै अन्तिम चारमा स्थान पक्का गरेको हो । टाइब्रेकरमा चेल्सीका सबै चारजना कोल पाल्मर, कोनर गल्लाघेर, क्रिस्टोफोर एनकुन्कु र मिखाइलो मुड्रिचले गोल गरे ।

न्यूक्यासलका कलुम विल्सन र ब्रुनो गुइमारेसले मात्रै गोल गर्न सफल भए । काइरन ट्रिपिएरको दोस्रो पेनाल्टी बाहिरिदा माट रिट्चेको चौथो पेनाल्टीलाई चेल्सीका दोस्रो रोजाईका गोलरक्षक जर्ज पेट्रोभिचले विफल पारे ।

त्यसअघि चेल्सीको मैदान स्टामफोर्ड ब्रिजमा मंगलबार राति भएको क्वाटरफाइनलमा न्यूक्यासलका कलुम विल्सनले गोल गर्दा चेल्सीका मिखाइलो मुड्रिचले बराबरी गोल फर्काएर टाइब्रेकरमा लम्ब्याएका थिए ।

१६औं मिनेटमा विल्सनले गोल गरेपछि चेल्सी खेलमा १–० ले पछि परेको थियो । तर, त्यो अग्रतालाई न्यूक्यासलले अन्तिम समयसम्म जोगाउन सकेन ।

इन्ज्यूरी समयको थप गरिएको दोस्रो मिनेटमा परिवर्तित खेलाडी मुड्रिचले गोल गर्दै खेललाई १–१ गोलको बराबरीमा ल्याए । ७८औं मिनेटमा रहिम स्ट्रर्लिङको स्थानमा मैदान छिरेका मुड्रिचले गोल गर्दै चेल्सीलाई खेलमा कायम राखेका थिए ।

यही खेलबाट फ्रान्सेली मिडफिल्डर फरवार्ड एनकुन्कुले चेल्सीबाट डेब्यु गरेका छन् । यसै सिजन जर्मन क्लब आरबी लाइप्जिगबाट चेल्सी आएका उनी सिजनको सुरुवातमै घुँडाको शल्यक्रियाका कारण झन्डै ५ महिना मैदान बाहिर रहे ।

यस्तै फुलहम र मिडल्सवर्गले पनि सेमिफाइनलमा स्थान पक्का गरेको छ । निर्धारित समयमा १–१ गोलको बराबरीपछि फुलहमले एभर्टनलाई टाइब्रेकरमा ७–६ ले पराजित गर्दै अन्तिम चारमा स्थान सुरक्षित गर्दा मिडल्सवर्गले पोर्ट भाललाई ३–० ले हरायो । अब लिभरपुल र वेस्ट ह्याम युनाइटेडबीत अन्तिम क्वाटरफाइनल खेल हुन बाँकी छ ।