एजेन्सी – उरूग्वेका स्टार फरवार्ड लुईस सुआरेज फेरि सुपरस्टार लियोन मेस्सीसँगै खेल्ने भएका छन् ।

मेस्सीसँग नजिकको सम्बन्ध रहेका सुआरेज अमेरिकी मेजर लिग सकर (एमएलएस) टोली इन्टर मियामीमा अनुबन्धित भएका छन् । मायामीले शुक्रबार आफ्नो सामाजिक सञ्जालमार्फत उनीसँगको अनुबन्ध सार्वजनिक गरेको हो ।

पछिल्लो समय सुआरेजले ब्राजिलियन क्लब ग्रेमियोबाट खेलेका थिए। ग्रेमियोलाई ब्राजिलियन सेरी एको दोस्रो स्थान दिलाउन उनको महत्वपूर्ण भूमिका रहेको थियो । शीर्ष स्थानको पाल्मेरास भन्दा ग्रेमियोको १ अंक मात्र कम थियो । सो सिजनमा ३३ खेलमा १७ गोल गरेका सुआरेज सर्वाधिक गोलकर्ताको दोस्रो स्थानमा रहेका थिए ।

मियामीमा उनले बार्सिलोनाका पूर्व सहकर्मी मेस्सीसहित सर्जियो बुस्केट्स र जोर्डी अल्बासँगै खेल्ने भएका छन् ।

‘इन्टर मियामीसँगको यो नयाँ चुनौती लिन पाउँदा म धेरै खुसी र उत्साहित छु’, सुआरेजले भने,’ साझा महत्वाकांक्षाको साथ के हासिल गर्न सक्छौं भन्ने बारेमा आशावादी छु । नया साथी र प्रशिक्षक हरुलाई भेट्न पनि उत्सुक छु ।’

मियामीका मालिक जोर्गे मासले सुआरेजलाई भित्र्याउन पाएकोमा खुसी छन्। उनले भने ‘सुआरेजमा रहेको जितको भोकले हाम्रा लागि फलदायी हुनेछ । अमेरिकामा माथिल्लो स्तरमा प्रतिस्पर्धा गर्न सक्ने टोली बनाउन विश्वका उत्कृष्ट खेलाडीहरुलाई क्लबमा ल्याउनेछौ भनेर समर्थकलाई वाचा गरेका थियौं।’

बार्सिलोनामा रहँदा मेस्सी र ब्राजिलियन स्टार नेयमारसँगै कीर्तिमानी ट्रायोका रुपमा स्थापित सुआरेजले आयाक्स, लिभरपुल, एट्लेटिको म्याड्रिड जस्ता क्लबबाट पनि खेलिसकेका छन् । उनले आफ्नो करियरमा ४ सय ५० भन्दा बढी गोल गरेका छन् ।

उनले युरोपेली च्याम्पियन्स लिग र कोपा अमेरिकासहित २० भन्दा बढी उपाधि जितेका छन् । उनी उरुग्वेका सर्वाधिक गोलकर्ता समेत हुन् । उनले राष्ट्रिय टोलीबाट १ सय ३८ खेलमा ६८ गोल गरेका छन् ।