काठमाडौं (हाम्रो खेलकुद) – नेपाल सुपर लिग (एनएसएल) को दोस्रो संस्करणको उपाधिका लागि आज (शनिबार) धनगढी एफसी र ललितपुर सिटी एफसी भिड्दै छन् । त्रिपुरेश्वरस्थित दशरथ रंगशालामा साँझ ५ः३० बजे फाइनल सुरु हुने छ ।

यी दुबै टोलीको फाइनल यात्रा बेग्लै रहेको छ । लिग तालिकामा दोस्रो स्थानमा रहँदै प्लेअफमा पुगेको धनगढीले क्वालिफायरमा पोखरा थन्डर्सलाई पराजित गरेको थियो । रोमान्चक एवंम् प्रतिस्पर्धात्मक खेलको निर्धारित ९० र थप समयमा २–२ को बराबरीपछि पोखरालाई टाईब्रेकरमा ४–३ ले हराउदै धनगढी अन्तिम दुईमा पुगेको थियो ।

सो खेलमा दुई पटक पछि परेको अवस्था उल्ट्याउँदै खेललाई टाईब्रेकर सम्म लम्ब्याएर गोलरक्षक मोहम्मद ताहाको भूमिका महत्वपूर्ण रह्यो । टाइब्रेकरमा मात्र उनले २ खेलाडीको बचाउ गरेका थिए ।

उता ललितपुरको फाइनल यात्रा भने कठिन थियो । पहिलो खेलमा बुटवल विरुद्ध २–० को जित निकाल्दै उपाधि दाबेदारका रूपमा आफूलाई प्रस्तुत गरेको ललितपुरले बीचमा लय गुमाएको थियो । शीर्ष दुईमा स्थान पक्का गर्न हात टार्नुपर्ने अन्तिम खेलमा पनि काठमाडौंल विरुद्ध पराजित हुँदै ललितपुर चौथो हुँदै प्लेअफमा पुगेको हो ।

फाइनल खेल्न दुई खेल जित्न पर्ने अवस्थामा दुबै खेल जित्दै ललितपुर फाइनल पुगेको हो । एलिमिनेटरमा काठमाडौंलाई नै ३–० ले हराएको ललितपुरले दोस्रो क्वालिफायरमा भने पोखराविरुद्ध १० जनामा सिमित रहेको अवस्थामा अतिरिक्त समयमा २–१ ले हराउँदै फाइनलको यात्रा तय गरेको थियो ।

विवेक पौडेल र रोशन पहरीलाई चोटका आजको खेलमा हुने छैनन् । पछिल्लो खेलमा रातो कार्ड खाएका भारतीय मिडफिल्डर निखिल कदमले पनि आज खेल्ने छैनन् । यात्रा भिन्न रहेपनि उपाधि जित्ने अन्तिम मौकाको खेल जित्नका लागि दुबैले हर सम्भव प्रयास गर्नेछन् । पछिल्लो संस्करणमा फाइनलमा हार बेहोरेको सम्झना भुलाउँदै धनगढी उपाधि उचाल्न चाहन्छ । धनगढीको च्याम्पियन बन्ने सपनामा बाधक बन्दै उपाधिमा उचाल्ने लक्ष्यमा ललितपुर हुनेछ ।

यसअघिको दुई भेटमा धनगढी र ललितपुर दुबै टोलीले जित निकाल्न सकेका थिएनन् । यस पटकको लिगमा गोलरहित बराबरी खेलेको यी दुई टोलीले सन् २०२१ मा भएको पहिलो संस्करणमा १–१ को बराबरी खेलेका थिए । आजको खेल जित्नेले टोलीले एकअर्कासँगको पहिलो खेल सफलता मात्र प्राप्त गर्ने छैन च्याम्पियन कै हैसियत बनाउनेछ ।