एजेन्सी – इंग्लिस प्रिमियर लिगमा आइतबार टोटेनहम हटस्पर विजयी भएको छ । अर्को खेलमा आर्सनल भने पराजित भएको छ ।

घरेलु मैदानमा भएको खेलमा टोटेनहमले बर्नमाउथ माथि ३–१ को जित हासिल गरेको हो । नवौं मिनेटमा पापे सारले जियोभानी लो सेल्सोको पासमा बक्सको भित्रबाट गोल गर्दै खेलमा अग्रता लिएका थिए । गोलकर्ता सारले पहिलो हाफमा नै चोटका कारण मैदान समेत छाडेका थिए ।

टोटेनहमले दोस्रो गोल गर्न ७१औं मिनेटमा सम्म कुर्नु परेको थियो । लो सेल्सोकै पासमा कप्तान सन ह्युङ–मिनले गोल गर्दै अग्रता दोब्बर बनाएका थिए । ८०औं मिनेटमा ब्रेनन जोन्सनको पासमा रिचार्लीसनले गोल गर्दै अग्रता अझै बढाए । ८४औं मिनेटमा बर्नमाउथका लागि एक सान्त्वना गोल फर्काएका थिए ।

जित पछि टोटेनहम २० खेलमा ३९ अंक सहित पाँचौं स्थानमा यथावत छ । बर्नमाउथ १९ खेलमा २५ अंक सहित १२औं स्थानमा छ ।

आर्सनलले भने तालिकाको शीर्ष स्थानमा जाने मौका गुमाएको छ । फुलहमसँग २–१ को हार बेहोरेपछि आर्सनलले पहिलो स्थानमा उक्लन पाएन ।

पाँचौं मिनेटमा बुकायो साकाले गोल गर्दै खेलमा आर्सनललाई अग्रता दिलाएका थिए । फुलहमले २९औं मिनेटमा राउल जिमिनेजले गोल गर्दै खेल बराबरीमा ल्याए । ५९औं मिनेटमा फुलहमकाबब्बी रिडले गोल गर्दै खेलमा अग्रता दिलाए । सोही गोल जितका लागि पर्याप्त भयो ।

आर्सनल २० खेलमा ४० अंकसहित चौथो स्थानमा रहेको छ । पहिलो स्थानमा रहेको लिभरपुलको १९ खेलमा ४२ अंक छ । एस्टन भिल्लाको २० खेलमा ४२ अंक नै रहँदा तेस्रो स्थानमा रहेको म्यानचेस्टर सिटीको १९ खेलमा ४० अंक छ ।