एजेन्सी – ब्राजिली फुटबल लेजेन्ड मारियो जागालोको निधन भएको छ । ब्राजिललाई चार पटक विश्वकप विजेता बनाएका मारियोको ९२ वर्षको उमेरमा निधन भएको हो ।

जागालोले खेलाडी र प्रशिक्षकको रुपमा ब्राजिललाई चार पटक विश्वकप फुटबलको उपाधि जिताएका थिए । विंगर जागालोले सन् १९५८ र १९६२ मा खेलाडीको रुपमा तथा सन् १९७० र १९९४ मा प्रशिक्षकको रुपमा ब्राजिलबाट फिफा विश्वकपको उपाधि जितेका थिए ।

सन् १९७० मा ब्राजिलले विश्वकप जित्न उनी टोलीका मुख्य प्रशिक्षक बनेका थिए । त्यसबेला ब्राजिलको टिमलाई सर्वकालीन टिमको रुपमा हेरिएको थियो । त्यसबेला पेले, जर्जिन्हो र कार्लोस अल्बर्टोजस्ता खेलाडी थिए ।

उनले अन्तिम पटक सन् १९९४ मा विश्वकपको उपाधि जिते । उनी त्यसबेला कार्लोस अल्बर्टो परेराको सहायक प्रशिक्षक थिए । सन् १९९८ मा उनी ब्राजिलको प्रशिक्षक बनेपनि त्यसबेला भने विश्वकपको फाइनलमा फ्रान्ससँग पराजित भएको थियो ।

ब्राजिल विश्वकप फुटबलको सर्वाधिक सफल टिम हो, उसले ५ पटक यो उपाधि जितेको छ । उनी खेलाडी र प्रशिक्षकको रुपमा विश्वकप जित्ने पहिलो प्रशिक्षक हुन् । यो उपलब्धि जर्मनीका फ्रान्ज बेकेनबाउर र फ्रान्सका डिडियर डेसच्याम्प्सले पनि भेटेको छ ।