एजेन्सी – साविक विजेता रियल म्याड्रिड स्पेनिस कोपा डेल रेको प्रि–क्वाटरफाइनलमा प्रवेश गरेको छ । दोस्रो डिभिजनको एरानडिनामाथि ३–१ को सहज जित हात पार्दै रियलले अन्तिम १६ मा स्थान पक्का गरेको हो ।

एरान्डा डुइरो स्पेनमा शनिबार राति भएको खेलमा रियलको जितमा जोसेलु, ब्राहिम डियाज र रोड्रिगोले गोल गरे । एरानडिनाले एक गोल उपहार पाएको थियो । सबै चार गोल दोस्रो हाफमा नै सम्भव भएको थियो ।

खेलको सुरुवातदेखि नै बल पोसेन राख्दै रियलले घरेलु टोलीलाई दवावमा राखेपनि गोलको लागि दोस्रो हाफमा पेनाल्टीको साहरा लिनुपरेको थियो । पेनाल्टी बक्समा ब्राहिम डियाजलाई जाजुले फउल गरेपछि रेफ्रीले रियललाई पेनाल्टी प्रदान गर्दा जोसेलु चुकेनन् ।

५५औं मिनेटमा ब्राहिम डियाजले गोल गर्दै रियलको अग्रता दोब्बर पारे । इन्ज्युरी समयको थप गरिएको पहिलो मिनेटमा रोड्रिगोले गोल गरेपछि रियलले खेलमा ३–० को अग्रता कायम गर्दै जिततर्फ अग्रसर बन्यो ।

इन्ज्युरी समयको थप गरिएको तेस्रो मिनेटमा नाँचो फर्नान्डेजले आत्मघाती गोल गरेपछि खेल ३–१ को स्थितिमा पुगेपनि त्यसपछि थप गोल निस्कन नसक्दा रियल विजयी हुन सफल भयो ।

कोपा डेल रेकै अर्काे खेलमा एट्लेटिको म्याड्रिडले लुगोलाई ३–१ ले पराजित गरेको छ । यस्तै ला लिगामा यो सिजन उच्च प्रदर्शन गरिरहेको जिरोना, गेटाफे, रायो भालेकानो र डिपोर्टिभो अलाभेसले पनि सफलता हात पारेका छन् ।