एजेन्सी – जर्मन फरवार्ड टिमो वेर्नर इंग्लिस क्लब टोटेनहम हटस्परमा अनुबन्धित हुने पक्का भएको छ । टोटेनहमले वेर्नरलाई आरबी लाइप्जिगबाट सिजनको अन्त्यसम्म लोनमा अनुबन्धित गर्ने सहमत भएको छ ।

टोटेनहमले यो सिजनको अन्त्यपछि स्थायी सम्झौता गर्ने विकल्पका साथ २७ वर्षीय वेर्नरलाई क्लबमा अनुबन्ध गर्न सहमत भएको छ । अब उनी यसै साता मेडिकलको लागि लन्डन जानेछन् ।

सन् २०२० मा वेर्नर ४५ मिलियन पाउन्डमा अर्काे लन्डन क्लब चेल्सीमा अनुबन्धित भएका थिए । तर, चेल्सीमा उनले सोचेअनुरुपको खेल पस्कन नसक्दा उनी २०२२ मा लाइप्जिग नै फर्किएका थिए । टिमोले चेल्सीका लागि ८९ खेलमा २३ गोल गरेका छन् । उनले चेल्सीमा दुई सिजन बिताउँदा च्याम्पियन्स लिगसँगै युइएफए सुपर कप जितेका छन् ।

वेर्नरले यो सिजन जर्मन बुन्डेसलिगामा १४ खेलमा २ गोल गरेका छन् । टोटनहम जाने निश्चित भएपछि वेर्नर शनिबार सेन्ट ग्यालेनसँगको मैत्रीपूर्ण खेलमा संलग्न थिएनन् ।

लाइप्जिगका अध्यक्ष मार्को रोजले वेर्नर उत्तरी लन्डन क्लब टोटेनहममा जोन पक्का भएको पुष्टि गरेका छन् । ‘यो सहि हो कि टिमो लोनमा जान चाहन्छन् । उनी युरोपियन च्याम्पियनसिप खेल्न चाहन्छन् ।’ रोजले भने, ‘हामी उहाँलाई शुभकामना दिन्छौं ।’

वेर्नरसँग जर्मनीबाट ५७ क्याप जित्दा २४ गोल गरेका छन् । उनले पछिल्लोपटक गत मार्चमा बेल्जियमसँग पराजित भएको मैत्रीपूर्ण खेल खेलेका थिए ।

ह्युङ मिन सन र जेम्स म्याडिसन अझै चोटका कारण बाहिर रहेकाले टोटेनहम फरवार्डको खोजीमा रहेको थियो । टोटेनहमले इंग्लिस प्रिमियर लिग अन्तरगत १४ जनवरीमा म्यानचेस्टर युनाइटेडसँग खेल्ने छ ।