पोखरा(हाम्रो खेलकुद) – १५औं आहा! रारा गोल्डकपको दोश्रो सेमिफाइनल खेलमा आज लक्ष्मी हुन्डाई मनाङ मर्श्यन्ग्दी क्लब र संकटा क्लब भिड्दै छन्।
यसअघि यसै प्रतियोगिताको पछिल्ला संस्करणमा दुइ पटक आमने-सामने भइसकेका यी दुई टोलीको खेलमा दुवैपटक मनाङले बाजी मारेको थियो। सन् २००५ र सन् २०१४को क्वार्टरफाइनलमा मनाङले संकटालाइ समान २-०को अन्तरले पराजित गरेको थियो।
प्रतिष्ठित आहा! रारा गोल्डकपको उपाधि पहिलोपल्ट जित्ने सुरमा रहेको संकटाले यसअघि क्वार्टरफाइनलमा नारायणगज एफसीलाइ पराजित गर्दै सेमिफाइनलमा स्थान बनाएको हो। मनाङले भने धरान एफ.सी.लाई ४-१ले हराउदै सेमिफाइनलमा स्थान बनाएको थियो।
खेल दिनको २:३० बजे पोखरा रंगशालामा सुरु हुनेछ। यस खेलको विजेताले शनिबार हुने फाइनलखेलमा आयोजाक साहाराको सामना गर्नेछ। साहाराले पहिलो सेमिफाइनलमा त्रिभुवन आर्मी क्लबलाई हराएको थियो।
