काठमाडौं (हाम्रो खेलकुद) – नेपाली राष्ट्रिय टोलीकी फरवार्ड सावित्रा भण्डारी ‘साम्बा’ ले फ्रान्सेली क्लब एन अभान्ट ग्वेंगाम्पको टोलीबाट डेब्यु गर्ने सम्भावना रहेको छ ।

शीर्ष डिभिजन डी१ अर्किमा अन्तर्गत जारी खेलमा ग्वेंगाम्पले बोर्डोको सामना गर्दैछ । क्लबले साम्बालाई बेन्चमा समावेश गरेको छ । टोलीले उनलाई २८ नम्बर जर्सी दिएको छ । पहिलो हाफ चलिरहँदा ग्वेंगाम्पले अग्रता लिइसकेको छ ।

साम्बाले शीर्ष डिभिजन क्लब अन आभान्ट ग्वेंगाम्पसँग डेढ वर्षको सम्झौता गरेसँगै उनले फ्रान्सको शीर्ष डिभिजन लिग खेल्ने पक्का भएको हो । इजरायलको हापोएल रानानासँग फ्रान्सेली क्लबको सहमति भएपछि साम्बा सोमबार त्यसतर्फ प्रस्थान गरेकी थिइन् । युद्धका कारण इजरायल नफर्केकी साम्बाले त्यहाँ छोटो समयमा जमेको प्रभावले फ्रान्सको यात्रा सम्भव भएको थियो ।

ग्वेंगाम्प लिगको १२ खेलमा २ जित,२ बराबरी र ८ हारका साथ ८ अंक जोड्दै दशौं स्थानमा छ । बोर्डोको १२ खेलमा ५ अंक छ । १२ टोली सम्मिलित लिगमा अझै यो सिजन १० खेल बाँकी रहेको छ ।

फ्रान्सेली लिग महिला फुटबलमा विश्वकै उत्कृष्ट मध्यको एक मानिन्छ । ओलम्पिक लिओने र पेरिस सेन्ट जर्मेनमा विश्व स्तरीय फुटबलर खेल्छन् र च्याम्पियन्स लिगमा पनि दाबेदारी रहँदै आएको छ ।

खेल प्रत्यक्ष हेर्न यहाँ थिच्नुहोस्