काठमाडौं (हाम्रो खेलकुद) – दोस्रो संस्करणको केपी ओली कपको खेल तालिका सार्वजनिक भएको छ । आयोजक राष्ट्रिय युवा संघ नेपालले मंगलबार काठमाडौँमा तालिका ड्र कार्यक्रम गर्दै तालिका सार्वजनिक गरेको हो ।

फाल्गुन ११ गते उद्घाटन खेलमा केपी टोली फुटबल क्लब र चर्च ब्वाइज युनाइटेड भिड्ने छन् । सो खेलको विजेताले क्वाटरफाइनलमा जावलाखेल युथ क्लबको सामना गर्नेछ ।

यसपटक प्रतियोगितामा १२ टोलीको सहभागिता रहने छ । आयोजक केपी ओली एफसी बाहेक चर्च ब्वाइज युनाइटेड, जावलाखेल युथ क्लब, मनाङ मर्स्याङ्दी क्लब, थ्रीस्टार क्लब, त्रिभुवन आर्मी एफसी, नेपाल पुलिस क्लब र मछिन्द्र क्लब सहित भारतका मानेभञ्ज्याङ क्लब एफसी र दिल्ली एफसी प्रतियोगितामा सहभागी रहने छन् ।

प्रतियोगिताका सेमिफाइनल अगाडिका खेलहरु सातदोबाटो स्थित एन्फा कम्प्लेक्सका हुने छन् । सेमिफाइनल र फाइनल दशरथ रंगशालामा हुनेछन् । प्रतियोगिता फाल्गुन ११ मा सुरु भई फाल्गुन १९ का दिन समापन हुने छ ।

प्रतियोगिताको विजेताले ११ लाख रुपैँया र उपविजेताले ५ लाख रुपैँया प्राप्त गर्नेछन् । प्रतियोगिता सर्वोत्कृष्ट खेलाडीले १ लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन् ।