काठमाडौँ (हाम्रो खेलकुद) – नेपाली टोलीकी स्टार फरवार्ड सावित्रा “साम्बा” भण्डारी सम्मिलित एन अभान्ट ग्वेंगाम्पले फ्रेन्च शीर्ष डिभिजन अन्तर्गत आज फ्लिउरी ९१ विरुद्ध खेल्दै छ । घरेलु मैदानमा हुने सो खेल साँझ ७:१५ बजे सुरु हुने छ ।

साम्बाको आज ग्वेंगाम्पका लागि घरेलु डेब्यु हुनेछ । गत शनिवार बोर्डो विरुद्ध ७५औ मिनेटमा मैदान प्रवेश गरेर साम्बाले डेब्यु गरेकी थिइन् । दोस्रो हाफको सुरुवातदेखि वार्मअपमा व्यस्त साम्बाले खेलको ७५ औं मिनेटमा मैदान प्रवेश गर्ने अवसर पाएकी थिइन् । उनले खेलमा गोल गर्ने अवसर नपाएपनि मिडफिल्डमा झरेर केहि पास साटफेर गरेकी थिइन् ।

बोर्डो विरुद्धको सो खेल १-१ को बराबरीमा सकिएको थियो । आठौँ स्थानमा रहेको ग्वेंगाम्पको १३ खेलमा २ जित, ३ बराबरी र ८ हारसहित ९ अंक छ । फेब्रुअरी १७ मा भने ग्वेंगाम्प र पेरिस सेन्ट जर्मेनको भिडन्त हुनेछ ।

साम्बाले शीर्ष डिभिजन क्लब अन आभान्ट ग्वेंगाम्पसँग डेढ वर्षको सम्झौता गरेकी छिन् । इजरायलको हापोएल रानानासँग फ्रान्सेली क्लबको सहमति भएपछि साम्बा फ्रान्सतर्फ प्रस्थान गरेकी थिइन् । युद्धका कारण इजरायल नफर्केकी साम्बाले त्यहाँ छोटो समयमा जमेको प्रभावले फ्रान्सको यात्रा सम्भव भएको थियो ।

प्रत्यक्ष प्रसारण हेर्न यहाँ थिच्नुहोस