सुमन अधिकारी,बुटवल

अक्सफोर्ड माविले बुटवल उपमहानगरपालिकाले आयोजना गरेको विद्यालयस्तरीय प्रथम बुटवल मेयर कप फुटबल प्रतियोगिताको उपाधि जितेको छ ।

फाइनलमा सोमबार नवीन औद्योगिक माविलाई १–० गोलको अन्तरले हराउँदै अक्सफोर्डले उपाधि जितेको हो । देवीनगरस्थित एन्फा टेक्निकल सेन्टरको मैदानमा भएको खेलमा विजयी अक्सफोर्डले उपाधिसँगै १ लाख रुपैयाँ र शिल्ड पाएको छ ।

दास्रो भएको नवीन औद्योगिक माविले ६० हजार तथा सेमिफाइनल पुग्ने उजिरसिंह मावि र एभरेष्ट माविले समान १८–१८ हजार रुपैयाँ प्राप्त गरेका छन् । अक्सफोर्ड माविका कप्तान सुजलमान घले सर्वोत्कृष्ट खेलाडी चुनिए ।

अक्सफोर्डका डेभिड थापा उत्कृष्ट गोलकिपर , रमित नाम्जाली मगर उत्कृष्ट मिडफिल्डर र अस्मित शर्मा सर्वाधिक गोलकर्ता बने । नवीन औद्योगिक माविका सन्दीप दर्जी उत्कृष्ट डिफेन्डर विजन सुर्यवंशीले उत्कृष्ट फरवार्ड बनेका थिए । सर्वोत्कृष्ट खेलाडीले १५ हजार अन्य उत्कृष्ट र सर्वाधिक गोलकर्ताले समान ८ हजार रुपैयाँ प्राप्त गरेका छन् ।

विजेता तथा उत्कृष्ट खेलाडीलाई बुटवल उपमहानगरपालिकाका प्रमुख खेलराज पाण्डे, उपप्रमुख सावित्रादेवी अर्याल, नगर खेलकुद विकास समितिका संयोजक बोनिन पिया, म्याच कमिस्नर हरिप्रसाद श्रेष्ठलगायतले पुरस्कृत गरे ।

प्रतियोगितामा सामुदायिकतर्फ १५ र संस्थागततर्फ १३ गरी २८ वटा विद्यालयको सहभागिता रहेको नगर खेलकुद विकास समितिका संयोजक पियाले जानकारी दिए ।