भक्तपुर (हाम्रो खेलकुद) – मध्यपुर थिमि नगरपालिका वडा लिग फुटबल प्रतियोगितामा मंगलबार दुबै खेल बराबरीमा टुंगिएको छ ।

मध्यपुर थिमि नगरपालिकाको प्रायोजन र मध्यपुर युथ एसोसियसनको आयोजनामा सानो थिमिस्थित मैदानमा जारी लिगमा दिनको पहिलो खेलमा वडा नं. १ र वडा नं. ३ ले गोलरहित बराबरीमा खेलेका थिए । यस खेलमा वडा नं. ३ का गोलकिपर अमर श्रेष्ठ म्यान अफ दी म्याच घोषित भए ।

वडा नं. २ र वडा नं. ८ को खेल भने १–१ को बराबरी भएको थियो । दोस्रो खेलमा वडा नं. २ ले खेलको अन्तिम मिनेटमा गोल गर्दै खेल बराबरी गरेको थियो । खेलको सातौं मिनेटमा सुजन सिपाई को गोलमा वडा नं. ८ ले अग्रता लिएको थियो । मैदानको बीच भागबाट सुशिल धेकेबाट आएको पासलाई दिपक बाँस दिएपछि सुजनले गोल गरेका थिए ।

९० औं मिनेटमा वडा नं. २ का उत्सव प्रधानले गोल गर्दै खेल बराबरीमा ल्याए । दोस्रो हाफमा मैदान प्रवेश गरेका उत्सवले फ्रिकिकमा गोल गरेको थिए । गोल लगत्तै उत्सवले रातो कार्ड पाए । उनले विपक्षी टोलीको बेन्च अगाडि गएर गोलको खुसियाली मनाएपछि रेफ्रीले रातो कार्ड दिएर मैदान बाहिर पठाएका थिए ।

वडा नं. ८ का पुर्व राष्ट्रिय खेलाडी बालगोपाल साहुखलले पनि ९० औं मिनेटमा रातो कार्ड पाए । गोलको खुसियाली मनाउन आएका वडा नं. ३ का खेलाडी उत्सव माथि हातपात गर्न गएको आरोपमा बालगोपाललाई रेफ्रीले रातो कार्ड दिएका हुन् ।

प्रतियोगितामा बुधबार दिउँसो साढे १२ बजे पहिलो खेल वडा नं. ४ र वडा नं. ७ बीच तथा दोस्रो खेल दिउँसो साढे ३ बजे वडा नं. ५ र ६ बीच हुनेछ ।